February 16-a Tripura-a assembly inthlan awm turah chuh turin mi 305-in an hming an pe.
Heng zinga mi 228 chuan Thawhtanni khan an hming an pe lut a, hei hi hming pek theih hun tawp ni a ni.
Tripura Chief Electoral Officer (CEO) Kiran Gitte chuan an pisa hian political party zawng zawngten nomination paper an thehluh theuh theih nan ruahmanna an siam tih a sawi.
“Thawhtanni kha hming pek luh theih hun tawp a ni a. Tute mahin thehluh chungchangah buaina leh harsatna an nei miah lo va. Nomination paper 228 zet kan dawng a, January 27 thleng kha chuan 77 chauh kan la dawng a, tunah chuan 305 a ni ta a ni,” tiin Gitte hian Thawhtannia Agartala-a thuthar lakhawmtute a kawmnaah a sawi.
Inthlan hnuhnung ber, kum 2018-ah kha chuan chuhtu mi 297 an awm a, an pung hret a ni.
Gitte chuan district pariata magistrate leh superintendent of police te chu dan leh thupek kenkawhna lamah tan la tur leh dan bawhchhia chu tumah hmaih lo turin a hriattir.
“Nomination paper thehluhnaah hian khawiah mah tharum thawhna, invauna leh dan leh thupek kenkawh tibuaia che candidate an awm hriat a ni lo va. DM leh SP tinte chu chutiang thleng a awm chuan report zel turin ka ti,” tiin CEO chuan a sawi.
Inthlan chuh tumten nomination paper an thehluh hnuah hian election commission chuan candidate tinte hi venhimna a pe nghal vek.
“Thawhlehniah endik nghal a ni dawn a, February 2 thleng chuh tumte tan hian hun hawn a ni,” a ti.
Hetih lai hian general observer 25-te chuan Pathianni khan police observer pariat theuh nen an duty-na tur hmun theuh an thleng tawh bawk.
“Special observer-te hi Meghalaya atanga lo thleng an ni,” a ti.