Brazil president hlui, Jair Bolsonaro chuan thla ruk daih US tourist visa a dil tih a dan hre miin BBC a hrilh.
Bolsonaro-a hi December 30 atang khan Florida-ah a la châm ngar ngar a ni.
President hlui hian immigration thuneituten visa an tihfel chhung pawh US-ah hian la awm zui a tum.
Tun thla tir lama amah thlawptu nia puh mipuiin Brazil-a sorkar hmun pawimawh tak tak an luhchilh chungchangah khan chhui mek a la ni.
Bolsonaro chuan kha buaina chhuak kha ‘pawi a ti’ tih a sawi a; mahse, an puh anga amah inrawlh anga sawina erawh a pha.
President hlui hian ‘kum 34 chhung zet chu vantlang tan’ hun a hmang tih a sawi a, ‘tunah chuan chawlh lam a rilruk’ tih a dan hre mi, Felipe Alexandre chuan BBC hnenah a hrilh a ni.
Bolsonaro hi US-ah hian A-1 visa an tih, ram palai leh hruaitu a nihna hmangin a zin a, hei hi ni 30 hnuah a thi dawn a. US hi amah thlaktu, Luiz Inácio Lula da Silva-a January 1-a lak luh a nih hma lawkin a pan a ni.
President hlui hian ‘intihthawvena United States-ah hian thla eng emaw zat chhung khualzin pangngai anga chet tlat leh a hnua a awm zel dan tur tihchian a tum’ niin Alexandre chuan a sawi a. A dan hre mi hi immigration law firm pakhat, AG Immigration tana thawk a ni.
US immigration thuneitute pawhin Bolsonaro hnen atang hian Zirtawpni khan B1/B2 tourism visa dilna an dawng tawh tih a sawi bawk.
January 8 khan president hlui thlawptu mi sang tel chuan kum 2022 inthlana a chak loh hnuah Brasília-a sorkar hmun pawimawh tak tak chu an luhchilh.
He thil thleng avang hian Bolsonaro hian dem a hlawh hle a, finfiahna awm si lova inthlan fel fai lova a puhna chuan a mite a fuih phurh nia puh a ni a. A thlawptute hian vengtute paltlangin presidential palace, Congress leh Supreme Court an luhchilh a ni.
Right-wing hruaitu hlui, US president hlui nena an inkungkaihna a that avanga ‘Donald Trump of the Tropics’ tia an sawi thin hi Florida-a mixed martial arts fighter thin, José Aldo-a inah a cheng mek.
Kissimmee, Florida-a a inah pawh hian a thlawptute an pungkhawm a, Florida hi US-a Brazilian cheng hmun ngaa thena hmun khat zet awmna a ni.
Washington DC Democratic senator-te chuan US-a Bolsonaro-a cheng hi tha an ti lem lo va. Tun thla tira President Joe Biden hnena lehkha an thawnah a diplomatic visa chu tihtawpsak turin an ngen.
“United States chuan mipui rorelna tiderthawnga tharum thawhtu a lo hum chu a tih tur a ni lo,” tih an sawi a ni.
Alexandre chuan Thawhtanni khan Financial Times hnenah Bolsonaro hian buaina chhuak kha ‘a mawhphurhna a ni lo tih a sawi’ tiin a sawi.