League lamah season harsa an hmang a, mahse FA Cup-ah erawh fifth round lut turin West Ham United in Derby County an hneh a, Manchester United nen an intum ang.
Pride Park Stadium a Thawhtanni zana inkhelah West Ham United hian 2-0 in an khingpuite hi an hneh a. October thla hnua a vawikhatna atan hnehna a zawnin an chang.
Everton laka hnehna an chan hnuah David Moyes-a’n a team a siksawi nual a. Player inhliamin squad a nghawng nasa chungin Hammers in an mamawh result an nei.
Minute 10-naah Michail Antonio thawhrah sengin Jarrod Bowen chuan an goal hmahruai a khung a. Second half tan hnu lawkah Antonio-a’n an goal hnihna a khung.
Hammers manager David Moyes hian a zawnin season thum chhung a club hlui hi cup inelnaah a hmachhawn dawn tihna a ni a. Nikum khan Carabao Cup-ah Hammers hian United hi an hneh tawh.
Inkhel zawh lamah Moyes chuan an season her danglam turin tukin zinga thlasik player bazar khar a nih hma in an che leh mai thei niin a sawi.
Hammers hian striker Danny Ings leh central defender Kurt Zouma te hun rei zawk chhung atan an chhawr thei dawn lo tih a chiang tawh.
Moyes chuan, “An pahnihin fit tha se midang kan mamawh lova, mahse tunah hi chuan kan pan deuh hlek.”
“Thutlukna siam awlsam a ni lova, a chhan chu rang taka thil tih zung zung a theih loh mai bakah hmanhmawh a thil tih chi a ni lo. Chutihrualin engmah a thleng lovang tih ka sawi bik lo. Kan chet theihna tur a awm chuan che ve thei tho kan ni.” tiin a sawi.