Aizawl : Law & Judicial Minister T.J. Lalnuntluanga’n nimin zing khan Champhai District Hospital a tlawh a, hospital tih changtlunna tura hnathawhte a enfiah.
Minister Manuna hian cheng nuai 18 bawr senna tur RT-PCR khawl bunna tur hmun chei bawl mek te,cheng nuai 81 senna tur Trauma Centre, Hospital Casualty nena sak zawm mek te, PM CARES Fund atanga bun PSA Oxygen Plant leh Suction Machine te tlawhin, a enfiah a, hnathawh mek chungchanga bawhzui ngaite, harsatna awm te chu thawktute sawi hoin, a chin fel dan turte an rel ho bawk a.
Thawktute nen an inkawmnaah Law minister chuan hnathawh mekte chu mipuiin an nghahhlelh leh ngaihchan reng a nih thute, theihtawp chhuaha tangruala a rang lama zo thei tura bawhzui tlan a tul thu a sawi bawk.
Law minister hian Nursing School Building pawh tlawh bawkin, Nursing Hostel sak mek pawh tlawhin hnathawh dante a enfiah a, contractor te hna tlo leh tha hun bituk chhunga zo turin a chah a. Nursing School hi kumin chhung ngeia class kalpui anih theih nana hmalakna tur trul te thawktute a sawi pui bawk a ni.
Forest minister ni bawk Manuna hian nilaini tlai khan Champhai Bethel Veng EF&CC Complex-a Conservator of Forest (CF), Eastern Circle Office sak mek pawh tlawin hmalak tawh dante bakah hmalak zel kawnga tulte a enfiah a ni.