Aizawl: Mizoram hmun hrang hrangah nimin khan lir a nghing thulha chet lak dan tur, ‘Earthquake Mock Drill’ neih a ni.
Aizawlah chuan National Disaster Management Authority (NDMA) leh Aizawl District Disaster Management Authority (ADDMA) buatsaihin neih a ni a. Chawhma dar 10-ah lirnghing hi 8.7 richter scale-a naa thawk anga tan niin, lirnghinna hmun (epicentre) hi Champhai atanga intan anga ruahman a ni.
Aizawl bawrhsap pisa-a District Emergency Operation Centre (DEOC)-ah Incident Response Team member-te an tlan khawm nghal a. Aizawl District Emergency Operation Centre (DEOC)-ah lir a nghin thu hriat a nih veleh ralkhel dar (siren) tihrik a ni.
DEOC atang hian Aizawl DDMA chairman, Aizawl Bawrhsap Dr Lalhriatzuali Ralte hovin chhiatrupna thlen thulha mawhphurtu hrang hrang – National Disaster Response Force (NDRF), State Disaster Response Force (SDRF), Assam Rifles, Mizoram Police, Fire & Emergency Services, H&FW, MPRO, Quick Response Team, Traffic Police, PHE, Power & Electricity Department, LC leh YMA-ah te chhiatna thlenna hmun leh thlen dan rang takin hriattir an ni.
Chhanchhuaktu pawl (emergency/quick response team)-te tirh chhuahna hmunpui (staging area) atan MINECO open gym bul tualzawl chu hman a ni a. Govt. JL HSS, New Market Building, Tuikual North lung tohlawt bul, RD Directorate leh Civil Hospital casualty-te chu lirnghing avanga hliam tuarte chhanchhuah hna leh nunna chânte lakchhuah hna thawhna hmun atan hman niin, Civil Hospital, Aizawl leh Agape Hospital, Chanmari te chu emergency makeshift hospital atan hman a ni a. Lirnghing vanga chhiatna chi hrang hrang thleng thei kangmei, leimin, in chim atanga chhanchhuah ngaite chhanchhuah dan tur chu mawhphurhtu chi hrang hrang ruatten a tak ang thei ber turin hna an thawk chhin a ni.
Mock Drill neih zawh hnu hian Aizawl District Emergency Operation Centre-ah ah thlir letna neih chhunzawm a ni a, incident commander leh observer ten report pein hmasawnna leh tan lak ngaihna laite sawiho a ni.