Aizawl: Mizoram Rajya Sabha MP K Vanlalvena chuan Uniform Civil Code chungchangah nimin khan Union Law & Justice Minister Kiren Rijiju zawhna a zawt a, nimin vek khan chhanna a dawng nghal.
Rijiju chhan atan K Vanlalvena hian sorkar laipui hian UCC Bill pass tumna a nei em tih leh bill pass tumna nei ta se, MNF leh India inremna thuthlung avanga siam, India Constitution Article 371(G) a nghawng buai thei ang em tih leh, nei ta se India rama hnam hrang hrangte hnam dan, customary law-te hi UCC chuan a palzut ang em? tihte a zawt a ni.
Union minister chuan Mizoram MP(RS) zawhnate hi chhang nghalin India sorkar chuan 21st Law Commission of India hnenah UCC-in a nghawng theih tur thil chi hrang hrangte lo zir chiang a, chumi zulzuia rawtna siam turin ngenna a lo thlen tawh thu te, Law Commission hotute chuan 21st Law Commission of India term chu August 31, 2018-ah a tawp tawh thu leh 22nd Law Commission-in a la ngaihtuah zawk tur nia a lan thu leh, hemi a nih avang hian tun dinhmunah UCC hman tumna engmah a awm loh thu nimin vek khan ziakin a chhang a ni.