Mizo Zirlai Pawl (MZP) in Mizoram State Subordinate Services Selection Board (MSSSB) hna lak dan an duh loh avanga lungawilohna an lan tir chu nimin khan an ti tawp.
MSSSB hna lak dana lungawilohna lan tir tu MZP hruaitute chu nimin khan sorkar aiawh Education Minister Lalchhandama Ralte-in a pisaa a kawm leh a, minister hian sorkar hmalak tum hrang hrang te MZP hruaitute chu a hrilh a ni.
Minister sawi danin, sorkarin MSSSB-in Asst. Grade a lak chungchangah chairman chu February ni 6 hmaa insawifiahna theh lut turin hriattir a pe tawh a, Assistant Grade Exam chungchangah hian thil felhlel a awm leh awm loh chhui chiang turin DP & AR (GSW) ruat an ni a, February ni 8 aia tlai loa report theh lut tura tih an ni.
Ram leilung fate tan Direct Recruitment Rules, dan hnuaia him leh felfai, tun aia tha zawk nei turin hmalak a ni dawn a, MSSB hnuaiah February chhungin hnalak result tih chhuah leh interview conduct a awm dawn lo a ni.
Sorkar hmalak tum te a sawi hnuah Education minsiter chuan MZP hruaitute chu lungawilohna an lantir chu tih tawp turin a ngen a ni.
Sorkar aiawh nena inkawmna an neih zawhah MZP hruaitute, College SU hruaitute leh Hnampual zirlai pawl hruaitute chu MZP pisaah an thukhawm zui nghal a, sorkar thuneitute ngenna angin MSSSB Chairman ban ngiata hma an lakna chu tihtawp an rel ta a ni.
Tarlan tawh thin angin, MZP chuan MSSSB-in tunhnaia Asst. Grade hna a lakah hnam dang pathum an tel chu a duh lo a, a mawhphurtua an puh MSSSB Chairman Ramhmangaiha chu January thla ral hmaa ban turin sorkar an phut a, an hun tiam chhunga sorkarin an duh a tih hlawhtlin loh avangin nilaini khan Secretariat Complex main building tualah an pungkhawm a, lungawilohna an lantir.
Hemi ni hian sorkar aiawh Deputy Chief minister leh MZP hruaitute chu inbiakna an nei a, inremna an neih theih loh avangin nimin khan MSSSB pisa kai tur dangin zirlai thenkhat an pungkhawm leh a, Education minister hoa inbiakna an neih leh hnuah sorkar nen inrem in, lungawilohna an lantir chu an ti tawp ta a ni.