Peace Accord MNF Returnees’ Association (PAMRA) chuan Bangladesh atanga Zohnahthlak Mizorama raltlante tan thuamhnaw chi hrang hrang nimin khan Parva-ah an thawn.
PAMRA-in nimina raltlante tan thawmhnaw chi hrang hrang truck trip khat an thawn a. He’ng an thawmhnaw thawnte hi Bangladesh Refugee Relief Committee, Mizoram (BRRCM) kutah an hlan a. Lunglei district leh Lawngtlai district PAMRA ten heng raltlante tana thawmhnaw an lo khawnkhawm te nen Parva an pan pui dawn a ni.
Thawmhnaw thawh chhuah a nih hmaa PAMRA pisaa inkhawmah Zothanmawia, Chief Organiser, PAMRA General Headquarters chuan thu a sawi a. PAMRA adviser Lalramnghaka’n tawngtaiin a thlah bawk.
PAMRA chuan an theih tawk tlem hle mah se, an theih chinah erawh Bangladesh Zohnahthlak raltlante an thlahthlam dawn lo tih an sawi.