White ball cricket a tunhnai a India batsman che tha fal tak Shubman Gill bawk a che leh a. India leh New Zealand inkhelah out lovin century siam lehin Men in Blue hi run 168 in a chakpui.
India leh New Zealand hian match thum awmna Twenty20 International Series an khel a, vawikhat ve ve chak tawhin Nilaini khan match hnuhnung ber an khel a. India chakin 2-1 in series an la.
Kum 23 mi India opener Gill hian ball 63 hmachhawnin run 126 lai a siam a. Ahmedabad a inkhelah hian India in over 20 atang run 234 siamin wicket li chiah an hloh.
Gill hi kuminah che tha hle in India tan inelna hrang hrangah innings 12 a inlan tawhah double century vawi khat, century vawi thum leh fifty vawi khat te a siam tawh a. Indian cricket chanchin a international bikah format pathum – Test, ODI leh T20I a century siam vek thei pangana chauh a ni.
Thla hmasa khan New Zealand lakah bawk Hyderabad-ah kum 23 leh ni 132 a upa niin ODI inkhelah double century siam thei naupang ber a lo ni tawh.
Bowling-ah India bowler-te an che tha tlang a, mi pathumin wicket hnih an lak rualin captain Hardik Pandya chuan over li atangin wicket 4 a la a, run 16 chiah a pe a. New Zealand hian over 12.1-ah run 66 chiah an siam thei.