Kum 1999 a an intawnna hmunah Manchester United leh Newcastle United te an intawng leh dawn. English Football League Cup final lut turin Manchester United in harsatna an nei lova, Nottingham Forest lakah 2-0 a hnehna changin 5-0 aggregate in semi-final ah an chungnung.
Nilaini zana Old Trafford a inkhelah hian second half-ah Manchester United in Anthony Martial leh Fred hmangin goal an khung a. First leg a 3-0 a chak tawh an ni chungin chak tum a khelin an duh ang result an nei.
Cup final khel dawn
Erik ten Hag-a’n inhliamin a squad a nghawng chungin team tha a rem a. Forward chhawr rim Marcus Rashford chiah a chawlh hahdam tir.
First half-ah goal lut lo mahse United dinhmun a derthawng lo. Second half-ah inhliam dam leh Anthony Martial leh rilru leh taksa inbuatsaihna tha zawk nei tura Netherlands a training neih tir Jadon Sancho te leh Rashford te dahluh an ni a. Inkhel an thlak danglam.
Rashford-a siamsak atangin Martial-a’n an goal hmasa a khung hnu lawkah Bruno Fernandes-a ball fing atang bawkin Rashford-a’n Fred a hnawl luh tur goal a siam leh bawk.
He inkhelah hian Manchester United in an midfield-ah hliam an ngah avanga an lakluh Marcel Sabitzer chu inkhel lo mahse a hmunah a team thar a en a. Kum 2017 hnua United trophy hmasa ber tun thla tawpah lakpui tumin a bei thei dawn.
United leh Newcastle te in FA Cup final-ah kum 1999 khan an intawng tawh a, hemi tum hian United hian hnehna an chang.
United manager Ten Hag chuan, “Kan result a lawmawm hle a, mahse final a chak hi a pawimawh. Final luh ringawt hi hlawhtlinna a ni lo.”
“Final-ah chak kan duh a, mahse chumi hma chuan tih tur kan ngah. Premier League-ah hmachhawp kan nei a, chumi hnuah chuan cup hi lak kan tum ang.” tiin khelh tur an ngah avangin hmalam thui lutuk an thlir lo tih a sawi.