Arsenal forward Gabriel Martinelli chuan Emirates Stadium-ah a hma hun a thlung nghet a, kum li leh a chanve daih contract thar a ziak.
Kum 21 mi Brazil international hian tun season-ah hma nasa taka sawnin Premier League hmahruaitu team tan veilam sira rinrawl a ni a. Inelna hrang hrangah vawi 27 inkhel tawhin goal sarih a khung bakah midang khung tur vawi thum a siamsak tawh.
Kum 2019 khan Ituano atangin Gunners hi a pan a, an tan vawi 111 a inkhel tawh.
Arsenal manager Mikel Arteta chuan, “Gabi hi a kum a la naupang hle a, hei vang hian hmabak thui tak a la nei a, hmasawnna tur a la tam tih kan hria.”
“He club kawr ha a khelmual a luh apiangin kan fans te hian a thiamna leh tha thawh thinte an hmu thin. Training-ah pawh hetiang reng hi a ni a, thawhrimna leh rilru puthmang dik a nei.”
“Hei vang hian a talent tha tak hi kan hnena a tihpun zel hlan kan nghakhlel a, Arsenal tana a inkhel zel tur hi kan phur hle.” tiin a sawi.
Martinelli contract hi nakkum nipui a zo tur a ni a. Kum khat ziah belh theihna awm mahse a chetthat avangin Gunners in thlun ngheh an duh a, a hlawh tihpunsak bawkin an squad a hlawh tam berte zingah a tel tawh.
Brazil tan nikum March thla khan inkhel tanin nikum World Cup-ah pawh a khel pha.