Juventus in season harsa an hmang chungin tun season-ah trophy chawi turin beiseina an la nei a. Lazio lakah 1-0 a chakin Coppa Italia semi-final an lut.
Ningani zanah Allianz Stadium-ah Juventus hian Lazio an mikhual a. Defender Gleison Bremer chuan halftime hma deuhin chakna goal hi a khung.
Juventus hian mahni mualah inkhel thunun zawk mahsela team pahnihten goal hlauhawm an siam tam lo ve ve.
Lazio in nidang angin an inkhel thei lova, an inkhel a dul bakah thahrui tha an lantir thei lo. Lehlamah Juventus in goal chhuah an hlau a, fimkhur taka goal vengin Lazio in si phurh sut beiseina an nei tam lo.
Minute 44-naah Juventus wide-man Filip Kostic chuan ball tha a cross a, hei hi Bremer-a’n a hun takah lo nang fuhin a tauh goal.
Massimiliano Allegri pawlte hian Atalanta 1-0 a hnehtu champion lai Inter Milan chu semi-final inkhel vawi hnih ni turah an hmachhawn leh ang.
Semi-final lehlamah AS Roma barakhaihtu Cremonese leh Fiorentina an inkhel ve thung dawn.
Juve coach Allegri chuan inkhel zawhah, “Zaninah kan inkhel a pangngai tha viau. Ball kan kawl tha a, kan in pe kual tha thin viau. Second half-ah phei kha chuan Lazio tan khan huntha kan pe mang lo.”
“Vawiinah kan inkhel a pawimawh ber erawh Monza nen kan inkhelh tuma first half a kan neih loh rilru puthmang dik kan nei kha a ni a. Player te hian inkhel a hnehna chang tur hian tactic tha leh mimal thiamna tha bakah rilru puthmang dik kan mamawh tih an hriat a pawimawh.” tiin a sawi.
League lama an dinhmun sawiin, “Inter in harsatna an tawh ka ring lova, Milan, Roma, Lazio leh Atalanta te hi 25% a champion theihna la nei vek an ni a. Lazio pawh an la awm bawk. Keini hi sawi theih ni lo mahse tuna kan el tawk chu kan tum leh tur Salernitana hi an ni.” tiin a sawi bawk.