Kum 30-a upa, Portuguese ui chu Guinness World Records-in khawvela ui upa berah a puang thar a, kum 100 chuang record ding tawh chu a lehpel.
Bobi tia an koh hi Rafeiro do Alentejo purebred niin heng uite hi kum 12 atanga 14 inkar chauh dam thei an ni.
Chawlhkar hnih liam ta maiah khan Chihuahua ui, Spike tia an koh chu kum 23-a upa niin ui dam lai zinga upa ber nihna lo pek a ni tawh.
Khawvela ui upa ber nihna chelhtu ni mek chu Australia-a mi, Bluey an tih niin kum 1939 khan kum 29 leh thla ngaa upa niin a thi.
February 1 khan Bobi chu kum 30 leh ni ni 226-a upa a ni chiah.
A kum zat hi Portuguese sorkara pet database pawhin a pawmpui niin data hi National Union of Veterinarians-in an chhinchhiah a ni tih Guinness World Records chuan a tar lang.
Portugal khawthlang lam tuipui kama Conqueiros khuaa Costa chhungkuain an vulh niin unau pathum a nei.
An enkawl tan laia kum riat mi chauh, Leonel Costa chuan a nu leh paten hetih hun lai hian ran tam tak an neih thu sawiin Bobi bik hi an hnen atanga a tlan bo thu a sawi.
Leonel leh a unaute chuan a nu leh pa hriat lohva zawngin an hmu a, an enkawl zui a, an chhung zingah a tel ve ta zel a ni.
“Bobi hian kan ei ang a nih chuan engmah duh loh a nei ngai lo,” tiin Costa chuan a sawi.
Kum 2018 khan a thawk a buai avangin damdawi inah dah a ngai a, Costa chuan Bobi dam rei chhan hi zalen takin, nuam ti taka a nun a hman vang nia a ngaih thu a sawi.
Bobi hringtu a pui hi kum 18 lai a dam bawk a, an inthlah a nih theih thu a sawi bawk.
A upat hnuah Bobi hian kal a harsat a, a khaw hmuh pawh a fiah tawh lo tih a sawi.
Costa chuan an chhungkuaa ran zinga dam rei ber a nih thu a sawi a, a danglam bik niin a sawi.