Nikum chhung khan cancer natna vei, Cancer Hospital, Zemabawka inziak lut 1,465 an awm a, heng zinga 752 chu mipa niin hmeichhia 713 an an ni.
Mizoram State Cancer Institute (MSCI)-in a tar lan danin kum 2022 chhung khan Cancer Hospital, Zemabawka cancer natna vei inziak lut zawng zawng 1,465 niin heng zinga mi 752-te chu mipa an ni a, mi 713-te chu hmeichhia an ni thung.
National Health Mission hnuaia programme pakhat, National Programme for Prevention & Control of Cancer, Diabetes, Cardiovascular Diseases & Stroke (NPCDCS)-in Cancer Dona Ni (World Cancer Day) nimina an hmannaah Mission Director, NHM Dr Eric Zomawia’n cancer vei tam lamah Mizoramin a chhe zawngin India ramah pakhatna a hauh hnem thu sawiin, ngaihmawhawm tak a nih thu a sawi a. Cancer natna laka inven theih a nih thu sawiin uar lehzuala zirtirna inpek a hun tawh thu a sawi.
Dr Eric Zomawia chuan chhul cancer thlentu, Human Papiloma Virus laka invenna pawh reilo te-ah Mizoramah kum 9-14 inkarte hnena pek tan a nih tur thu a sawi bawk.
MSCI, Zemabawk-a Director Dr. Jeremy L. Pautu pawhin cancer vei thar chu a ni tela an pun zel avangin MSCI pawh thuam changtlun chhoh zel a nih thu a sawi a. Cancer enkawl kawngah Mizoramin bul a tan tirh laite ngaihtuah erawh chuan nasa taka hma a sawn thu a sawi bawk a ni.