Aizawl: Mizoram Larsap Hari Babu Kambhampati-a’n nimin khan Khawzawl district tlawhin district hotute, kohhran, political party leh pawl hrang hrang hruaitute a kawm bakah PMAY (Urban) hnuaia hamthatna dawngtute a tlawh bawk.
Nimin zinga DC Conference Hall-a thutkhawmah larsap chuan Khawzawl district chu district naupang tak a ni chungin kawng tinrengah hma a sawn nia a hriat thu a sawi a. Faina chungchangah midangte entawn an ni mek chu chhuanawm a tih thute, agriculture leh horticulture huanga hmalaknate leh nizung chakna hmanga kawlphetha siam chhuah hna buaipui mek te chu tha a tih thu a sawi.
Larsap chuan kawngpui sial leh hmasawnna ruhrel khawih mekte chu a hun taka zawh a pawimawh thu sawiin, project pakhat thawh rei lutuk avangin project tha tak tak tam tak a chan theih tih a sawi a. Mipui hamthatna tura sorkar laipui scheme hrang hrangte pawh a dawngtu turin an dawn theihna tura hma la turin sorkar hnathawkte a chah.
RD leh development department danga hmalaknaah self help group (SHG) a tam thei ang ber siama kaihruai turin larsap chuan thawktute a fuih a; hmeichhiate duhsaka an hmasawnna turte scheme hrang hrangah ngaihtuah turin a chah bawk.
Khawzawl district hotuten an sawi danin Khawzawl district-ah khawpui (urban town) pathum leh thingtlang (rural village) 26 a awm a, 2011 chhiarpuia a lan danin, mihring 36,381 awmin, April 1, 2021-a chhinchhiah a nih danin ziak leh chhiar thiam zat zaa 96.64 a ni.
Larsap chuan khawpuia chengte tana insak tanpuina scheme, Pradhan Mantri Awas Yojana (PMAY-U) – Housing for All (HFA) Urban hnuaia tanpuina dawngtute pawh tlawhin scheme awmzia leh tangkainate a hrilhfiah a, an hmuh dan leh chhawr tangkai dan te a zawt bawk a ni.