Commerce & Industries Minister Dr R Lalthangliana hovin nimin khan Secretariat Conference Hall-ah Mizorama oil leh gas zawn hna chak zawka thawh dan tur sawiho a ni.
He thutkhawmah hian Directorate General of Hydrocarbons (DGH), ONGC, Oil India Ltd, NHIDCL leh Mizoram PWD bakah Mizoram sorkar atangin Commerce & Industries leh Geology & Mining hotute an tel a. Minister Dr R Lalthangliana chuan Mizorama gas leh oil zawn hna tibahlah thei thil hrang hrangte sawihova a chin fel dan ngaihtuahho a tul thu a sawi.
ONGC hotute chuan oil leh gas zawn hna chu hun eng emaw chen an thawh hnuah pawh tun thlengin beisei ang hmuh an la neih loh thu he thutkhawmah hian an sawi a. Hma an lo lak tawhnate avangin data tam tak erawh an lakkhawm theih phah nia sawiin, hei hian an zirchian zelna turah a puih tur thu an sawi a. Oil zawngtu dang, Oil India Ltd nen an data-te inhrilh hre tawna a huhova zirchian leh zualna, joint study kalpui an tum thu an sawi.
Oil zawngtute chuan an hnathawhna tur hmunah an bungraw lian leh rit tham tak takte thiar luhna tur kawng tha an mamawh thu sawiin, Mizoram PWD chu bailey bridge an dawh lai chu zo thuai tura hma la tura tih an ni a. NHIDCL pawh kawng siam hna a thawh mekah leiverhna tur hmun panna kawng bikte chu siam zo thuai tura ngaih pawimawh bika neih tura tih an ni bawk.
Sorkar thuchhuahin a tar lan danin Mizorama oil leh gas zawn hna thawk turin ONGC leh Mizoram sorkar chuan kum 2003-ah inremna thuthlung an ziak a, kum 2007-ah Oil India leh Mizoram sorkarin thawhhona thuthlung an ziak ve leh bawk a ni.