Aizawl: Nimin khan MPCC Treasurer, Zodintluanga, MLA chuan Congress Bhavan Lungleiah Lunglei District Mahila Block Conference cum Political Training hmanpuiin thu a sawi a. MNF Party-ah bân hri na takin a leng mek a, district khawpui pakhatah phei chuan bânna thehlut an tam lutuk avangin a awlsam zawk nan bawm an dawh tawp niin a sawi.
MPCC treasurer chuan MNF chhungkua-ah inten tawnna leh inrin loh tawnna a thlen mek avangin bân hri hi a leng nasa hle ni a sawi a, “An member tam tak bakah MLA thlengin an bâng mek,” a ti.
An MLA leh minister-te zingah bang mai tur pawh an la awm a rin thu a sawi bakah, “A hnuhnung hnung phungin seh tih ang maiin, a chimin an chim mek a ni,” a ti.
CLP leader chuan Officer On Special Duty (OSD) to Chief Minister Re. 1 hlawha chhawr chu MLA inthlanpui kum leh MNF atanga an mi leh sa te bân runpui kum a lo thlen tak avangin loh theih lohin tun hnaiah an inbântir thei hram a ni, a ti a. “OSD to CM Re. 1 hlawh khan hna a thawh chhunga sum a hman ral leh Mizoram tana a hnathawh hmel inthlauhna kha lei leh van ang a nih a rinawm,” tiin a sawi a, “Re. 1 hlawh OSD a bân veleh kan police-te pawhin kuhva rah ro an man ta teuh mai,” a ti bawk.
MPCC treasurer chuan Congress party chu party ruhrel lian leh inrelbawlna felfai tak nei an nih thu sawiin, Mizoram khaw tinah Congress party-a chhum hmin, rual u zawkte bakah nu leh pa leh thalai thlenga an awm vek thu a sawi.
“Tunlai hian party pakhat party hminga feh chhuak ve si, tute nge an party mi leh sa pawh hre loten Zoram hmun hrang hranga zinin, ‘Kalphung thar’ an auhlaah an hmang a. Mahse, an hruaitu lawkte rilru chhungril chu inhlat tak tak a nih si avangin an zawrh kual mek leh an auhla hi a hralh a tla lo hle tih a lang chhoh mek a ni,” CLP ;eader chuan a ti. Chu party chu puak darh mai thei dinhmuna ding reng an nih thu a sawi bawk.