Myanmar police-te chuan mipuiten an thlan, Aung San Suu Kyi-i chu Thawhtanniah sipaiten thuneihna chhuhsaka rorelna fawng an chelh hnuah thubuai hrang hrang an siamsak.
An custody-ah February 15 thleng awm rih tura tih a ni bawk tih police lehkha pawimawhah tar lan a ni.
Suu Kyi-in dan a bawhchhia tia an puh zingah hian ram dang leh an ram chhung dan bawhchhiatna leh dan phal loh inbiakpawhna hmanraw kawl te pawh a tel.
A awmna chin pawh tun thlengin hriat a la ni lo va, thenkhat erawh chuan an khawpui, Nay Pyi Taw-a a chenna inah sipaiten an hreng niin an sawi.
A ruala president atanga paih thlak Win Myint erawh lung inah a tang mek nia rin a ni a. Ani pawh dan bawhchhiaa puhna zingah Covid-19 hripui len laia phal lohva mipui pun khawmna huaihawta puh a ni.
President emaw, Suu Kyi-i emaw pawh, Thawhtanni zing hma taka sipaiten an an thuneihna an chhuhsak hnuah an awka hriat tur a la awm lo ve ve.
Min Aung Hlaing-a kaihhruai sipaite hian member 11 awmna sorkar an din thar a, kum khat chhung emergency an puang mek bawk.
Sipaite hian November thlaa an ram inthlanpui neiha Suu Kyi-i kaihhruai, National League for Democracy-in hnehna an chan pawm lovin rorel lai hi thuneihna an chhuhsak.