La Liga champion lai Real Madrid in league hmahruaitu Barcelona nena an inkar chu point nga ah an tihniam a. Player 10 a inkhel zo Valencia lakah 2-0 in hnehna an chang.
Santiago Bernabéu a Ningani zan inkhelah Los Blancos in an khingpuite lakah hian goal mawi hmangin hma an hruai a. Minute 52-naah Marco Asensio chuan a ke veilamin goal ropui a khung.
Minute hnih hnu lekah Real Madrid tan forward Vinicius Junior chuan an goal hnihna a khung ve nghal a. Real Madrid tana vawi 200 a inkhelhnaah goal a khung.
Valencia tan defender Gabriel Paulista chu minute 72-naah Vinicius laka buaina a siam avangin red card pek a ni.
Blancos hian Antonio Rudiger hmangin first half-ah goal an khung emaw an ti hman a. Halftime dawnah Luka Modric cross chu a tauh lut. Mahse VAR hmanga enfiah niin Karim Benzema foul avangin pawm a ni lo.
French striker hi second half-ah mal hliam a nei nia langin lakchhuah a ni bawk.
Real Madrid boss Carlo Ancelotti chuan, “Inkhel tha pangngai tak niin ka hria. Kan kheltha a, tunah hian kan chak tluang mek a, kan boruak pawh a tha zawngin a kal leh tawh.”
“First half kha second half aiin duhthu a sam lo zawk a, second half-ah kan khingpuite an tlahniam a, kha khan kan tan remchang min siamsak thin.” a ti a. An striker Benzema inhliam chu hlauhthawnawm lutuk a nih loh thu a sawi tel bawk.