Aizawl: Rorel lai, MNF party National Executive Meeting, nimina Aizawl West Joint YMA Multipurpose Hall-a neihah MNF President Zoramthanga’n a kaihhruai sorkarin corruption leh thil dangah mualphona liantham a nei lo niin a sawi.
MNF President Zoramthanga chuan, “He kan ministry hi corruption leh thil dangah mualphona liantham kan nei lo va, Covid hripui a leng chungin hmasawnna hna nasa takin kan thawk a, chu chu mipui hian an hria,” a ti a. “Pathianin MLA tha tak tak 27 min pekten an bialah theihtawpin tan an la a, hmasawnna ropui tak an kalpui mek,” a ti.
Zoramthanga chuan eptu party-ten sorkar an beihna chungchang sawiin, “He sorkar an beihna ber chu ‘financial management thiam lo’ tih a ni a. Kan sawi tawh angin Covid hripui avangin kan sum hmuh tur Rs. vaibelchhe 3,000 chuang kan hmu lo va, hei hian harsatna nasa tak min siam a ni,” a ti.
Kumin kum tawpa Mizoramin MLA inthlanpui a hmachhawn turah sorkarna an siam leh ngei an beisei thu pawh sawiin, “Kan khingpui party-te en hian kan sorkar leh ngei a rinawm zual,” a ti a. Congress party chu an artelukawn hial a rin thu sawiin, ZPM pawhin a tira an sawi uar em em, tuna sawi ngam tawh loh an ngah hle niin a sawi.
MNF National Executive meeting hian resolution pass-in, Covid-19 leng do kawnga sorkar hmalakna lawmawm an tih thu leh Mizoram leh Assam ramri buai ching fel tura sorkar hotuten inbiakna hmanga hma an la chu tha an tih thu te an sawi a. Hri leng karah MNF sorkarin SEDP a sem theih avanga lawmawm an tih thu te, sorkar hmalakna an chhuan thu te, Mizoram sorkarin Myanmar leh Bangladesh raltlan a lo kuangkuah dan chhuanawm an tih thu te, an President Zoramthanga hruaina chu an rintawk thu leh Mizoramin MLA inthlanpui a hmachhawn turah pawh an sorkar leh ngei dawn nia a lan avanga lawmawm an tih thu te an resolution pawmah chuan a tel.