Assam chief minister, India hmarchhaka BJP puipa ber pakhat ni bawk, Himanta Biswa Sarma chuan an thenawm state pathuma assembly inthlan awm turah chiang takin hnehna an chang vek dawn niin a sawi.
“Meghalaya-ah BJP hi politics-a thiltithei takah a chang chho dawn a. Tripura-ah pawh party lian zawk nihna kan chelh chho ang a, Nagaland-ah pawh NDPP nen sorkarna kan siam leh ang,” tiin NDTV-in an kawmnaah a sawi.
BJP hian Zirtawpni khan Meghalaya leh Nagaland-a inthlana an party atanga chuh turte an puang a. Tripura-ah hian February 16-ah inthlangin Meghalaya leh Nagaland-ah February 27-ah inthlan zui a ni ang.
State pathumah hian BJP hian thuneihna an chang mek vek a, kum 2024 inthlanpui atan tuna hnehna chan leh hi a pawimawh a. Tripura-ah hian saffron party hi MLA ngah ber niin bial 36 an thut mek a, a hmaa MLA nei lo kha niin hma an sawn hle a. IPFT nen sorkar an siam a. State dang pahnihah pawh regional party nen sorkarna an chelh bawk.
“BJP hian Tripura a thlak hlawk a. Left hun lai kha chuan mipuiin sorkar kha engah mah an ngai lo,” tiin Sarma chuan NDTV a hrilh.
Tun tum inthlanah hian Left leh Congress chu tangrualin BJP paih thlak an tum a. Left Front hian bial 60 awmah 47-ah chuhin Congress-in bial 13 an chuh dawn a. BJP-in bial 55-ah chuhin IPFT-in panga an chang.
Meghalaya-ah Conrad Sangma kaihhruai, National People’s Party chuan BJP leh regional party dang paliin sorkarna an chang mek a. Meghalaya Democratic Alliance tia party paruk tangho hi kum 50 chhunga term tluan chelh thei pathumna chauh an ni a. Tun hnaiah an inkarah khi a awm neuh neuh va, BJP hian anmahniin bial 60 an chuh vek dawn.
Mamata Banerjee-i kaihhruai, Trinamool Congress chuan a vawi khat nan an chuh ve dawn a. Eptu party lian ber, Congress atangin chief minister hlui, Mukul Sangma hvin MLA 17 an neih zinga 12 zetin an zawm tawh.
Nagaland-ah kum 2018 khan BJP-in bial 12 changin NDPP kaihhruaina hnuaiah Neiphiu Rio-a chuan sorkar a siam a. Tunah pawh hian NDPP nen bawk an tang dun leh dawn a. Bial 60 awmah NDPP-in bial 40-ah chuhin BJP-in bial 20 an chuh dawn.
“Hmarchhaka BJP thil hlu neih chu Prime Minister Narendra Modi-a thatna a ni a. BJP hi tunah hian a hma zawng aiin hmarchhakah an lian zawk dawn a ni,” tiin Sarma chuan NDTV hnenah a sawi a ni.