Latin America-a ram lian ber, mi maktaduai 214 zet hruaitu kha a ni thin a. Tunah erawh chuan Brazil ram far-right hruaitu hlui hi Florida khaw te reuh te-ah chengin thingpui dawrah pawh amahin thil a ei mai mai tawh.
Kum 67 mi, Jair Bolsonaro chu December thla tawpa a tlanchhiatna, United States-ah a khawsa mek a. US-a a luh hnuah hian amah thlawptute chuan Brasilia-a sorkar hmun pawimawh tak tak luhchilhin leftist Luiz Inacio Lula da Silva thlan tlin a ni chu an pawm lo.
Buaina chhuakah hian Bolsonaro hi a inrawlh tia puhin chhui mek a ni a, amah erawh chuan a pha thung.
Presidential palace changtlung taka cheng thin, US president hlui, Donald Trump-a sangawizawnpui, Bolsonaro hi tunah chuan veng lian lo takah, Disney World resort bul maia in lian lem lo takah a awm.
US-a chawlhkar ruk a awm tawhah Bolsonaro hi a khawsa hniam hle a. Orlando-a Brazilian martial arts champion thin, Jose Aldo-a in hluiah awmin supermarket-ah te a bazar a, KFC fast-food restaurant-a amah chauhva thil a ei lai thlate pawh lak fuh a ni.
Zirtawpniah erawh kha chuan mi tam tak kaihhruai thintu hian American conservative organization pakhat, Turning Point USA-in Trump National Hotel, Doral, Miami-a hun an buatsaihah mi 400 vel hmaah thu a sawi ve thung.
He thil huaihawtnaah hian Trump-a a inrawlh em tih erawh hriat a ni lo.
Bolsonaro hma lam hun hi engtin nge ni zel dawn tih a la chiang lo.
January thla tawpah Brazil-ah a kir dawn tih a sawi tawh a; mahse, kar liam ta khan US-a thla ruk dang awm leh theihna visa a dil thar thung.
A fapate zinga pakhat, Senator Flavio Bolsonaro chuan kar hmasa vek khan president hluiin an ram leilung a rah leh hun tur hi hriat a ni rih lo tih a sawi.
“Naktuk pawh a ni thei a, thla ruk hnu pawh a ni thei a, a lo kir tawh dawn miah lo pawh a ni thei,” tiin thuthar lakhawmtute hnenah a sawi.
Thawhlehni kal ta khan Orlando-a thingpui dawrah Bolsonaro hian ‘Brazilian politics-ah a la inhmang zel dawn’ tih erawh a sawi a. Eng ang takin nge a inhman dawn erawh a sawi lo thung.
Tunah hian Bolsonaro hi mawl leh hniam taka nungin a awm zel dawn nge, US atang hian insiam lian leh turin hma thar a la dawn tih hriat a ni lo.
“American mipuite hmasawnna tur leh thatna duhtu ka ni reng a; an zalenna, ram leh hnam an hmangaihna leh an puanzar an hmangaihna tilangtu ni tura rilru pu ka la ni reng,” tiin Zirtawpnia thu a sawinaah hian a sawi.