Chile chuan an ram hmun hrang hranga ram kang chu kangthelhtuten an la thelh mit hlei thei lo va, mi 23 vel thi tawhin emergency puanna region a pung leh ta.
Inrinnia emergency a puan lehna hi chhim lama Araucania region-ah a ni a, a hmain Biobio leh Nuble region-ah lo puang tawhin heng hmunte hi Pacific vaukam hrula mite an ni.
Emergency puan a nih hnuah hian sorkarin kang thelh turin sipaite pui turin a tir thei tawh a ni.
“Khaw awm danin a zir loh avangin kang hi thelh a harsa em em a, a inman kai chak lutuk a a ni,” tiin Interior Minister Carolina Toha chuan Santiago khawpuia thuthar lakhawmtute a kawmnaah a sawi.
“Hetiang zela a kal lohna tur hian kan chet chhuah a ngai,” a ti.
Kangmei chhuak kaihhnawihah hian mi 23 vel an thi tawh a, mi 979-in hliam an tuar bawk a. Mi 1,100 chuangin hmun him an pan.
Thi zinga 11 vel hi Biobio-a Santa Juana khua, Santiago atanga km 500 vela hlaa mite an ni.
Thi zinga pakhat hi Bolivian pilot niin Araucania-a ram kang thelh pui tura helicopter-a chhuak niin a tla a. Chilean doctor pakhat a thi tel bawk.
Inrinni (India-a Pathianni chawhma) thleng khan hmun 232-ah ram a la kang niin thuneituten an sawi a, heng zinga 16 hi a hma ni atanga kang tan niin nipui thawh mekah khaw lum lam pawh 40°C chung lam a ni.
Disaster Mitigation Agency-in Zirtawpni zana an dinhmun an tihchhuahah chuan hmun 151-a kang chu an thunun tawh tih an tar lang a. Ram hectare 40,000 zet a kang chhe tawh.
A kanna region pathum hi mihring cheng tlemna leh farm tamna a ni.