Everton manager thar Sean Dyche-a’n a tha thei ang berin a club tharah bul a tan a. Premier League hmahruaitu Arsenal chu 1-0 in a hnehpui nghal.
Goodison Park a inkhelah Thawhtanni a Frank Lampard thlak tura an lakluh Dyche hian a team thar hi inelna hrang hrangah match 11 chhunga a vawikhatna ni turin a chakpui a. Hnehna an channa kawngah Burnley a a player pawimawh thin pahnih bawk an tangkai.
Centre-half James Tarkowski chuan minute 60-naah Dwight McNeil corner pet a tauh lut a. Everton tantu thawm a ring.
Toffees hi inkhel tir lama chance nei tha zawk an ni fova, striker Dominic Calvert-Lewin chance tha neih a khung loh a uihawm.
Lehlamah Arsenal tan lakluh thar Leandro Trossard chuan huntawp dawnah an si phurh a sut teuh bawk.
Gunners an tlawm avang hian nizana Manchester City leh Tottenham inkhelah City an chak chuan an inkarah point hnih chauh a awm rih ang.
Arsenal boss Mikel Arteta chuan, “Ka player te lakah kar kalta emaw thla hmasa ai khan lawmna lian tak ka nei. Chak tluan laia inrin tlat hi chu a awl. Mahse tunah hian tlawm mah ila kan dinhmun awmna avang hian ka chhuang a, an phu a ni.” tiin a sawi a.
“Kawng a awlsam dawn lova, fiahna tam tak a awm dawn. |an kan khawh a, vawiin aia tha a kan khelh kha a ngai” a ti bawk.
Tlem mahse an buai lo
Manchester United in Old Trafford inkhel boruak sangah hnehna an chang a. 2-1 in Crystal Palace an hneh.
Bruno Fernandes-a’n Will Hughes handball vangin penalty atangin goal hmahruai a khung thuai a. Second half tan atanga minute 17 a kal lehin Rashford-a’n an goal hnihna a khung a. World Cup hnuah goal 11 a khung tawh.
Inkhela sawihlawh erawh referee Andre Marriner thutlukna a ni a. Jeffrey Schlupp chuan Antony a foul luih vangin an buai zui a. Heng buaina karah United midfielder Casemiro chuan Will Hughes chu nam sawn tumin a nghawngah tham a. VAR hmanga endik hnuah hnawhchhuah a ni.
Tlem zawk an nih hnuah Schlupp chuan goal khat a khung zui nghal a, mahse Palace in si phurh an sut thei lo.
Inkhel zawhah Manchester United boss Erik ten Hag chuan thutlukna a sawisel na hle. “Casemiro khan a tih tur ni lo a ti. Chutihrualin player pahnih khat ni lo team pahnih an buai a. Midang pawh hrem theih a che an awm.” tiin Jordan Ayew chetdan a sawi zui.
Sawi belh zelin, “Foul hlauhawm takin kha thil kha bul a tan a, khang kha inhliam theihna a ni. Heng thil hi hmaih lova en ni thin rawh se. Kan inkhelh hmasak pawhin hmai hliam nei kan awm tawh. Kar hmasa lahin Christian Eriksen foul hlauhawm vangin kan chan bawk.” a ti bawk.
Liverpool an mualpho leh
Kum 2012 hnuah a zawna Premier League away inkhel vawi thum an tlawmna ni turin Liverpool an mualpho a. Wolverhampton Wanderers in 3-0 in an hneh.
Minute 5-naah Hwang Hee-chan ball cross chu Joel Matip-a’n an lamah a ti lut a. Minute 12-naah Craig Dawson chuan goal hnihna tauh lutin second half-ah captain Ruben Neves chuan an goal thumna a khung.
Liverpool manager Jurgen Klopp chuan inkhel zawhah, “Bul kan tan chhe hle a, kan thiam loh a ni. 2-0 hnuah erawh kan che tha tan dawn a, 2-1 ni thei se thil a danglam ngei ang. Mahse Wolves khan point thum hmuh an phu.” tiin a sawi.