Queen band anga an chetchhuah tir lam khan concert-a fan te’n an hla an lo zawm dual dual a, an sakpui ve thin khan an ngai thei lova, an ei lo thin hle niin, guitarist Brian May-a’n a saw.
Total Guitar magazine hmaah, “A tirah khan fan te hian kan hlasak leh music play te hi ngaithla mai se, kan duh a, darkar tam tak chhung hla thu ziak a, an phuah te kha an lo ngaithlak ve mai kan duh thin. ‘Mipuite u, ngaithla mai teh u. Heng hla siam tur hian kan thawkrim hle a, ngaithla ve ngawt mai rawh u’ tihte’n kan sawiho thin.
Mahse, dan theih an ni lova, an sa luih luih zel tho,” a ti.
Khatih lai khan fan te’n an lo sakpui dual dual thin kha thil thar a ni a, thil thleng zen zen loh a nih avangin Queen band ang pawhin a ngaihna na hre lo a, an pawm hlei thei lova, an rilru tihnual a, beidawnna thlen lek lek tu a ni fo.
Kum 1970s tawp lam khan Bingley Hall, Midlands, England-a,, ‘We Will Rock You’ an sak tum khan boral ta an zaipu Freddie Mercury chuan band member dangte ngaihdan ang lo takin ngaihdan a nei thut mai a, mipuite’n an zai an lo zawm a, an lo sa ve dual dual chu fuihphur zawk chi a nih thu leh kha hei hian an performance thlenga nasa taka a tihthat pah thu a thiante a hrilh a, an pawm ve thei ta chauh a ni awm e.