- Mahmuaka Chhakchhuak
ZUK LEH HMUAM BANSAN
Zuk leh hmuam tih hian Meizial leh Sahdah hi kan tinzawn ber mai thei a, heng bakah hian Tuibur, Khaini Kuhva thleng pawhin a huam thei vek tho tih hria ila a tha ang e. Zuk leh hmuam avanga sum leh pai luanral hnem zia hi kan ngaihtuah lo mai thei a, luang ral hnem tak a ni. Cigarette bawm pakhat hi Rs. 50/- man angin han ngai ila; nikhatah bawm khat ang zela zuk chuan thla khat (Ni 30 angin chhut ila) ah Rs. 1,500/- a ni. Kum khatah phei chuan Rs. 18,000/- daih a ni a, tam tak a ni. Hei hi sum leh pai nei zawkte tan chuan a tam hauh lo mai thei a, nimahsela sum leh pai nei leh thawkchhuak tamte tan pawha a tamna chhan chu Cigarette hian taksa tana thatna pakhatmah a neih loh vang a ni. A awmzia kan hrethiamin a rinawm, taksa tana thatna engmah nei chuang si lo tana heti zat sum leh pai luangrual a, kan sen ral hi a uihawm tihna a nih chu.
Hei chauh hi Zuk leh hmuam that lohna a ni lo a, zuk leh hmuam tite rimchhiat dan hi dawhtheih a har thin viau bawk. Mizote hi mahnia awm thei lo, then leh rual leh huau huau ngaina mi tak kan nih hlawm avang hian eng hun emawah loh theih loha midang kianga awm hun a awm thin. Chutiangah chuan zuk leh hmuam timite kianga awm chu hrehawm duh tak a ni. Tunlaiin hmun thenkhatahte chuan ‘Smoking Zone’ siamin chutah chuan meizial zukna hun buatsaih thin a, nimahsela an rim chu a reh mai chuang si lo a, dawhtheih a har thin viau. Smoking Zone awm lohna hmun, khawilai hmun pawha zalen taka zuk theihna hmuna hawihhawmna nei reng reng loa meizial an han pak khuk luih luih phei hi chuan hrehawm duh tak a ni a, zah pawh dawn loa hmun danga kalsawn mai a awl thin.
Vawi khat chu ka thianpate Inah lengin zingah ka kaitho chawp a, khum atanga rawn tho tih hriat tak hian Towel a rawn vengin kawr pawh ha lo chuan Inhnuai atangin a rawn chhuak a, meizial a rawn zu chhuak bawk lehnghal a. Kan titi a, minute 10 chhung vel kan inkawm hnuah chuan ‘ka lu a hai tlat mai’ tiin a thu lai chu tluk a tum ta mai a, rang taka tlan phei nghalin chhuatah chuan rem takin ka mut tir a, engmah hre loin a awm chu a ni nghal mai nen chuan ka buai hman hle mai. Ka theih ang ang chuan tih harh tumin ka sawi a, ka beng a, ka thing nawk nawk bawk a, pawnchhe huhtea kan han deh kual hnuah chuan a rawn harh leh ta hram a ni.
Khatia engmah hre lo a a awmna chhan kha Medical lama thiamna engmah ka neih loh avangin ka hre lo nain a pum ruah laia meizial a zuk chu keichuan ka puh ber a ni. Ama taksa pawh alo chak lo sa thei tho bawk tak nain zingkarah chuan a taksain a zo lo ni berin ka hria a, a nunnain a tuar hman thelh a, a vannei takzet a ni. Hei vang hian zuk leh hmuam hian taksa a lo hneh dawn hle mai tih min ngaihtuah tir a, a zu mi tan pawh nghei theih emaw zuk tlem tlem hram hram a tha viau. Zuk leh hmuam ang bawka kan taksa tana tha lo tur kan chin dawklak thil dangte ngei pawh hi mahni taksa hmangaihna avang tal pawha kan sim a tha hle. Zuk leh hmuam ang chiahin tunlaia kan thalai tam takte saltanna – Ruihhlo ngei pawh hi a ngawlvei a awl viau an ti a, heti tak maia kan thalaiin an han buai phah ta mai hi a pawi hle mai a, huaisen taka do let tura inbuatsaih a ngai a ni.
EI LEH IN LAMA CHINTAWK NEIH
Puitling leh thalai zingah pawh dul kiar tak tak hmuh tur kan tam ta hle mai, hei hi a chhan tam tak a awm theih rualin ei leh in lama chintawk kan neih loh vang a ni ve bawk. Tun hnaiah hian ka naute Catering buaipui hi an zinga telin ka pui zauh zauh a, mi chaw ei lai hi ka hmu fo a, a thente hi chu mak ka tih tam tak a awm. Tumkhat phei chu patling pakhat hian vawk thau hi hrang engemawzat a suak a, mak ka lo ti ru hle a ni, thlenga leng lo khawpa chaw leh chawhmeh suak lah kan la tam bawk. Tu tan pawh hian chaw khawrh pangngaia khawrh hnih hi puar nan chuan alo tawk viau mai a, a aia tam chu a belhchhahna mai mai chauh a ni. Dul alo len phah a, taksa pawhin alo mamawh tawh lem lo thin avangin reiloteah inthiar kan mamawh ngei ngei bawk nen a lo tul vak lo.
Ei leh in hi taksa tana mamawh lak luhna ber a nih avangin kan fimkhur pawh a tul viau a, chintawk nei lek loa kain a duh chhung kan ei mai thin chuan taksain zawh loh hun a nei mai thin. Catering-ah phei chuan Item tam tak an siam thin a, ei chakawm tak tak a nih bawk avangin ei vek tum ngawt kha a tul ber lo mai thei. Kan taksa mamawh lam chi kan hriat a, taksa tana tha lo tur chu ei loh ngam pawh a tha. Entirna atan Chi al pawh hi taksain a mamawh aia tam ei a awl em em a, engkim alo mil vek bawk avang hian thleng sirah kan chhawp hnur thin. Hei vang hian Chi pawh hi a tlem thei ang ber ei tum ila, chawhmeh al sa hi duhtawk theih a tha viau a ni. Zunthlum kan neihna chhan hi mithiamte chuan inthlahchhawnna atang hian 30 %– 50% chu neih theih a ni a, a dang chu kan ei leh in atanga insiam a ni an ti. Soft drink leh Fast food kan uar tak atang pawh hian Zunthlum kan neih phah thin niin an sawi bawk a, taksa sawizawi peih lote hian an nei awlsam bawk niin an sawi.
Mahni taksa hmangaihna chang pawh kan hriat tawh loh chuan a pawi dawn hle a, midang chu kan hrilh thei lo a nih pawhin keimahni tal chuan taksa hmangaih nachang kan hriat a ngai a ni. Dam rei kan duh a, hrisel that kan duh bawk chuan tuna kan han tarlan thil pahnih hi thil pawimawh tak a ni tih kan hriat a tha. Thenkhatte hi chuan natna kan tawh chiah hian kan han harhchhuak ta thin a, a tha tho tak nain duh ai chuan a tlai thin. Kan hrisel that lai tak hian taksa i hmangaih zawk ang u.