Congress chuan nimin khan Maharashtra-an an party president atan Nana Patole an ruat tih an puang a, Balasaheb Thorat a thlak ang.
Patole-a hi Bhandara district-a Sakoli bialtu MLA a ni a, Ningani khan Maharashtra assembly-a speaker a nihna atangin a bâng chiah.
“Congress president chuan Nana Patole chu Maharashtra Pradesh Congress Committee president atan a ruat thar,” tiin party thuchhuahah tar lan a ni.
Congress chief Sonia Gandhi chuan working president atan mi paruk – Shivaji Rao Moge, Basavaraj Patil, Mohamed Arif Naseem Khan, Kunal Rohidas Patil, Chandrakanth Handore leh Pranati Shushilkumar Shinde ruat bawkin Patole-a an thawhpui ang.
Maharastra unit-ah hian vice president tur 10 a ruat bawk a, an zingah hian Rajya Sabha member hlui, Hussain Dalwai pawh a tel.
Congress hian an hmaa lawka tual chhung roreltu thlantur thlirin member 37 awmna Parliamentary Board an din bawk a. Strategy, Screening & Coordination Committee an siam thar bawk.
Maharashtra-ah hian Congress hian Shiv Sena leh Nationalist Congress Party thawhpuiin rorelna fawng chelh mektu an ni.
An state-a party hruaitu insiksawi tur chungchangah hian Thorat-a kaihhruaiin Congress minister-te chu Delhi-ah kalin hmunpui lama an hruaitute an sawipui hmasa.
State budget session chu March 1 atang hian an thukhawm tan dawn bawk.