Mahindra Maxx Pikup Mizoram Open Boxing Championship zawh fel a ni a, weight hrang 15-ah Serchhip boxer pasarihin gold medal an la a, Assam Rifles-in mi 30 vel lak an tum.
Zirtawpni zanah Serchhip Boxing Hall-ah khar a ni a, inhnek hnuhnung ber lightweight final-ah khawtual mipui tan hlawh tak, New Serchhip chhuanvawr Fredy Lalchhanchhuaha’n harsa takin Lalruatfela a hneh a, split decision-in a chak.
Light middleweight-ah Joseph Lalrintluanga a champion a, final-ah round thum la fai vekin Lalnunmawia a hneh a, hmeichhia lightweight final-ah inhnial theih takin K Zairempuii chuan split decision-in Rebecca Lalfakawmi a hneh.
Ningani khan Serchhip boxer pali – Lalngaihawmi, Phoibi Malsawmtluangi leh Vanlalrinngheti bakah, Lalchhanhima ten an khelhna weight-ah gold medal an awrh tawh a, Ngaihawmi’n hmeichhe boxer tha ber lawmman a dawng.
Lightflyweight-ah Micky NT Beipatla chuan round tin la vekin Lalnunpuia a hneh a, boxer tha bera thlan a ni.
Flyweight-ah K Lalhriatchhunga a champion a, Bantamweight-ah Lalruatfela chuan gold medal awrhin, Featherweight-ah Nazareth Lalthazuala hnehtu Omega Lalramdina a champion a, Middleweight-ah Hriata Chhunthang chuan harsatna tawk lovin gold medal a dawng.
Best boxer Beipatla leh Ngaihawmi’n trophy leh cheng singkhat an dawng a, Lunglei SAI boxer Lalruatfela leh Rebecca Lalfakawmi hnenah final-a chak lo zinga tha ber lawmman cheng sangnga hlan a ni a, Lunglei SAI naupang H Zonunsanga chuan promising boxer lawmman cheng sanghnih a dawng.
Serchhip District Boxing Association hruaitute chuan hlawhtling taka championship zawh theih a nih avangin lawmthu an sawi a, an thawhpui 42nd Assam Rifle chuan boxer 103 tel zinga 30 vel sipaiah lak an tum tih an sawi a, boxer 38-in dilna theh lut nghalin, a hun laia lehkhat theh lut hman lo tan pawh hun an hawn belh zui.
Zirtawpni zan final result
Lightweight (57-60 kg, Women)
K Zairempuii (Serchhip) bt Rebecca Lalfakawmi (Chuhvel Mamit)
= Split Decision (29-28, 29-28, 30-27)
Lightflyweight (45-48 kg, men)
Micky NT Beipatla (Siaha New Colony) bt Lalnunpuia (Kolasib)
= Unanimous Decision (30-27, 30-27, 30-27)
Flyweight (48-51 kg, men)
K Lalhriatchhunga (College Veng, Aizawl) bt Vanmalsawma (Hnahthial Electric Veng)
= Unanimous Decision (29-28, 30-27, 30-27)
Bantamweight (51-54 kg, men)
Lalruatfela (Phainuam) bt K Lalrodinga (Lunglei SAI)
= Unanimous Decision (30-27, 30-27, 30-27
Featherweight (54-57 kg, men)
Omega Lalramdina (Dinthar Aizawl) bt Nazareth Lalṭhazuala (Zemabawk Aizawl)
= Unanimous Decision (30-27, 29-28, 30-27)
Lightweight (57 – 60 kg, men)
Fredy Lalchhanchhuaha (New Serchhip) bt Lalruatfela (Lunglei SAI)
= Split Decision (29-28, 30-27, 28-29)
Lightmiddleweight (67-71 kg, men)
Joseph Lalrintluanga (Serchhip Chanmari) bt Lalnunmawia (Tlangnuam Aizawl)
= Unanimous Decision (30-27, 30-27, 30-27)
Middleweight (71-75 kg, men)
Hriata Chhunthang (Bethlehem Aizawl) bt Lalduhsanga (North Vanlaiphai)
= Unanimous Decision (30-27, 29-28, 30-27
MI MAL CHAWIMAWINA
BEST BOXER : (trophy + Rs 10,000)
Mipa – Micky NT Beipatla (Siaha)
Hmeichhia – Lalngaihawmi (Serchhip)
BEST CHALLENGER : (Rs 5,000)
Mipa – Lalruatfela (Lunglei SAI)
Hmeichhia – Rebecca Lalfakawmi (Chuhvel, Mamit)
PROMISING BOXER : (Rs 2,000)
H Zonunsanga (Lunglei SAI)