Aizawl : Home depa- rtment buatsaih Gorkha chhiarpui atanga a lan danin kum 2021-ah Mizoramah Gorkha 7686 an awm a. Mizorama mihring awm zat aţanga chhutin zaa 0.59 a ni.
Gorkha chhiarpui report, January ni 27, 2023-a Council of Ministers ţhukhawmin an pawm taka a lan danin kum 20 kalta, 2001-ah Mizoramah Gorkha 4453 an awm a, kum 20 chhungin 3233 an pung a, kum sawm dana an punna zaa 36.3 a ni. Mizorama Gorkha chhiar- puiah hian January ni 26, 1950 hma lama Mizorama cheng tawh leh an thlahte chauh chhiar an ni.
Chhiarpui report-a a lan danin Gorkha-te hi Aizawl district-ah tam berin mi 5318 an awm a, Kolasib district-ah 1353 awmin, an tlem berna Champhai district-ah mi 5 an awm a, Mamit district-ah 76 an awm bawk.
Mizorama awm Gorkha engemawzat te chu British-in Mizote tukdawl tura beihpui a thlak ‘Vailen’ an tih maiah tel tawh te nia hriat an ni a. Kum 1835-a din, Cachar Levy an tih, tuna Assam Rifles ni taah pawh Gorkha tam tak an lut a, Mizorama awm ţhenkhat chu an inbengbel zui a, MNF-in zalenna an sualnaah pawh Gorkha engemawzat chu an rammu ve nghe nghe a ni.