Pakistan president hlui, kum 1999-a sipai chakna hmanga thuneihna chhuh luitu, General Pervez Musharraf chu kum 79 mi niin a thi.
Hruaitu hlui, kum 2001 leh 2008 inkar zawnga president hi rei tak enkawl a nih hnuah Dubai-ah a thi tih an ram sipai chuan a puang.
Musharraf-a hi Pathianni tukah damdawi inah a thi tih thuneituten news agency hrang hrang hnenah an sawi bawk.
Tual chhung TV channel Geo News chuan a chhungten an dil angin hruaitu hlui ruang hi United Arab Emirates atang hian a bika duan thlawhna hmangin Pakistan-ah lak a ni dawn niin a tar lang.
A thih thu puangtu sipaiten thuchhuah an siamah chuan a chhungte an tawrhpui tak zet thu an tar lan a, “Allah-in thlarau kal ta malsawm sela, a kalsan a chhungte hnenah chakna pe bawk rawh se,” an ti.
Pakistan President Arif Alvi pawhin ‘a thlarau kal ta chu chatuana chawl hahdam tur leh a chhungte pawh an thil chân mekah huaisenna leh chakna pe turin a tawngtaisak’ tih pisa thuchhuahah tar lan a nih thu AFP chuan a tar lang.
Pakistan Prime Minister Shehbaz Sharif pawhin Musharraf-a thi chu pawi a tih thu leh sipai hruaitu a nih laia ram tana thil tam tak a tihte chu ropui a tih thu a sawi.
Pervez Musharraf
1943 Delhi, India-ah a piang
1961 Pakistan Military Academy a zawm
1999 Thisen chhuah lovin sipai chakna hmangin thuneihna a chhuh a, kum hnih hnuah president a ni zui
2007 Thuneihna a chan a tawp
2008 An ram a chhuahsan a, 2013-2016 inkarah a kir leh
2014 An ram phatsana che-ah puh a ni