Argentine superstar Lionel Messi chuan second half-ah goal pawimawh tak a khung a, Paris Saint-Germain in hnehna chan theih phahin 2-1 in Toulouse lakah an chak.
Inrinni zana Ligue 1 inkhel a hnehna an chan avangin PSG hian point 8 in hma an hruai lailawk a. Messi-a’n tunhnai league inkhel hnuhnung panga atanga a goal thumna khungin game 22 atangin point 54 an hmu tawh.
Parc des Princes-a inkhelah PSG in an mualah bul an tan chhia a. Toulouse an tlangnel viau. Minute 20-naah Branco van den Boomen hmangin goal an khung a, mikhual zawkin hma an hruai.
First half-ah Achraf Hakimi chuan an si phurh a sut a. Second half-ah Christophe Galtier chuan a pawlte siamtha in Messi-a’n minute 58-naah an chakna goal a khung.
Star forward dang Neymar leh Kylian Mbappe te inhliam avangin an khle lova. Messi hi Vitinha leh Hugo Ekitike ten an thlawp.
Inkhel zawhah Galtier chuan a player fakin, “Lionel kha kan inkhelah a khawlpui ber a ni. Goal a khung bakah goal hlauhawm tam tak team tan a siam. Khatiang a tih theihna tur khan team pumpui kha a tana inkhel turin ka ti a, zalenna a neih zawk nan a team te a tana an thawhrim a pawimawh.” a ti.