Aizawl: BJP Mizoram Pradesh General Secretary Malsawmtluanga chuan Mizorama sorkarna lo chelh tawhte leh chelh mekten a thlang tlingtu mipuite hamthatna tur atan hna an thawk lo fo niin a sawi.
Chawlhkar kalta tawp khan Malsawmtluanga hian Mamit constituency huam chhunga khaw pathum – Khanthuam, Tuirum leh Dampui khua tlawhin BJP Booth Level Workers Meet a neih pui.
Heng hunah hian thu sawiin, “Mizorama sorkarna lo chelh tawhte leh chelh mekte hian an minister nihna leh MLA nihnate chu a thlang tlingtu mipuite hamthatna tur atan hna an thawk lo fo tih chu tunah a takin ka hmu chho mek zel a ni,” a ti.
Mi tinin an chanvo an chan tur ang an chang ngei tur tih chu BJP-in thupuia an neih a nih thu sawiin Malsawmtluanga hian, prime minister scheme hrang hrang kaltlanga India mipui chawikanna pawh hi mi tinin, khaw tinin an phu mai ni loin, an chanvo tur a nih thu a sawi a. Thingtlang hmun kilkhawr tak takten sorkar laipui hamthatna an dawn loh avanga an tawrhna te chu BJP chuan a hriatpui a; chuvangin, thingtlang mite tawrhna leh harsatna sukiang turin BJP Mizoram chuan theihtawp chhuahin hma a la zel dawn tih a sawi.
Kumin MLA general election lo awm tur hi Mizoram tan a pawimawh hle dawn a. He inthlanah BJP-in thuneihna changa an sorkar chuan BJP sorkarna state dangte hmasawnna ang bawkin Mizoramah hmasawnna a thleng dawn nia sawiin, “BJP kan thlan tlin chuan hmasawnna kan thlang dawn tih a chiang a, party dang kan thlang a nih erawh chuan vawiina Mizoram dinhmun ang tho hi kan hmabak a ni leh dawn a ni,” a ti bawk.
Malsawmtluanga hi Mamit district hruaitute leh state hruaitu thenkhatten an tawiawm a, an zinnaah hian BJP Thalai Unit an din nghal bawk.