Union Home Minister Amit Shah, Union Defence Minister Rajnath Singh, West Bengal Chief Minister Mamata Banerjee leh Uttar Pradesh Chief Minister Yogi Adityanath te chuan tun kar chung hian campaign-in Tripura an tlawh dawn.
Tripura inthlan lo awm tur chu kil hrang hrang atangin chuh a ni dawn a. Rorel lai, BJP chu Indigenous People’s Front of Tripura (IPFT) nen an tangdun dawn a. Kum 25 zet ro an rel hnua kum 2018-a BJP-in an paih thlak tak, Left chuan Indian National Congress an thawhpui dawn.
Trinamool Congress leh lal thlah, Pradyot Manikya Debbarma kaihhruai, Tipra Motha te erawh chuan a malin an chuh dawn a. Party pahnih hian BJP hneh chu an tum ber a nih thu an sawi ve ve.
Pathianni khan Trinamool Tripura chief Pijush Kanti Biswas, Bengal-a Education Minister Bratya Basu, Industries and WCD Minister Shashi Panja, Rajya Sabha MP Sushmita Dev, leh Trinamool MLA leh minister hlui, state-in-charge Rajib Banerjee te chuan thuthar lakhawmtute kawmin an party manifesto an tlangzarh.
Biswas chuan BJP-in an thutiam an tihlawhtling lo tih a sawi a. Banerjee chuan thalai hna nei lote tan stipend an pe dawn tih a sawi a, in tinah tui thianghlim un tur pek te, kawngpui tha siam te, SC/ST scholarship, lo neitute pension siamte an tiam bawk.
West Bengal Chief Minister Banerjee chuan Thawhtanniah campaign hawng turin a zin dawn a. Agartala-ah lutin Udaipur a pan ang a, Thawhlehniah Mata Tripureswari Temple-ah tawngtaiin ‘padayatra’ (kea kawng zawh) a huaihawt zui ang.
Pathianni hmasa khan Trinamool hian an candidate tur mi 22 an puang tawh a. State in-charge Banerjee chuan inthlang turin an inpeih vek tawh tih a sawi.
Union Home Minister Shah pawhin Thawhtanniah vek Tripura a thleng dawn a. Khowai district-a hmun hnih leh South Tripura district-a Santirbazar-ah vantlang inkhawmah thu a sawi dawn a. Agartala-ah road show a nei bawk ang.
Defence Minister Singh leh Uttar Pradesh Chief Minister Adityanath te pawhin Thawhlehniah campaign turin Tripura an thleng bawk ang.
Tripura-ah hian inthlan chuh tur tan January 30 thleng hun hawn niin February 16-ah vote thlak a ni ang a, March 2-ah chhiar a ni ang.
Kum 2018 assembly inthlanah khan BJP chuan bial 60-ah 36 an la a, an thawhpui, IPFT chuan bial riatah hnehna an chang ve bawk.