Lir a nghin lai hi zing dar 4:17 a ni a, Turkey chhim lam, Gaziantep-a cheng, Erdem-a chu a mut tui lai tak a ni a, an ram chanchina lirnghing na ber hian a sawi harh.
“Hetiang reng renga na hi ku 40 chhungin ka la hre ngai lo,” a ti a. “Na tak takin vawi thum min sawi a, naute then bawm kan sawi dawrh dawrh ang mai hi a ni,” a ti.
Mite chu in chim laka him nan an car panin an tlan suau suau a. “Gaziantep-a cheng tumah an ina awm an awm ka ring lo,” tiin Erdem-a chuan a sawi.
Gaziantep atanga khawthlang kam km 209-a hla, Adana-ah pawh Nilüfer Aslan-a chuan an chenna in chhawng nganaah na taka sawi an tawn chuan an thi ngei dawn tiin a sawi lawk.
“Hetiang hi ka dam chhungin ka la hre ngai lo, minute khat dawn chu min then a ni,” a ti.
“Ka chhungte bulah chuan, ‘Lirnghing a nih hi, a rualin hmun khatah kan thi ngei dawn e,’ tiin ka sawi a. Chu chauh chu ka rilrua awm a ni,” a ti.
A sawi a reh chuan Aslan-a chu rang takin a tlan chhuak a, “Engmah pawh ka la chhuak lo, ka slipper nen pawnah ka va ding ringawt,” a ti a. An in bul vela in pali chu a lo chim tih a hmuh thu a sawi bawk.
Khawchhak lam km 482-a hla, Diyarbakir-ah chuan mipuite chu chhanchhuah hna thawktute pui turin an tlan khawm.
“Hmun tinah kan te tengtung mai,” tiin kum 30 mi pa pakhat chuan Reuters news agency a hrilh a. “Lung lian tak takte chu ka dah sawn a, thiante inhliam ka la chhuak a; mahse, te thawm a reh chuang lo va. Rescue team an lo thleng zui ta bawk,” a ti.
Muhittin Orakci-a chuan in chim hnuaiah a chhungte pasarih an tan thu a sawi.
“Ka farnu leh a fate pathum kan awm,” tiin AFP news agency a hrilh a. “A pasal, a pasala nu leh pa a chhilh,” a ti.
Syria-ah pawh lir a nghin tanna atanga darkar hnih vel tlan, Aleppo-ah chuan in tam tak a chim a. Health director Ziad Hage Taha chuan hliam tuarte chu ‘tui fawn ang maia an lo thlen zut zut’ thu a sawi.
Malatya-a cheng kum 25 mi, Özgül Konakçı chuan aftershock leh khaw vawt lutuk chuan thil a tibuaithlak zual tih a sawi.
“A vawt em em a, vur a tla reng,” tiin BBC Turkish a hrilh a. “Kawtthlerah mi tin an chhuak a, eng nge tih ber tur pawh an hre lo. Kan hmuh lai ngeiin aftershock avangin kan ina darthlalangte chu a keh chuai chuai a ni,” a ti.
Lirnghing vawi hnihna a thawh lai khan Turkish news channel A Haber-a camera operator chuan a la fuh a, in chim atangin hmanhmawh takin a tlan chhuak a, a thawmah chuan in chim lai thawm pawh a hriat.