Kar tawp liam ta chhung khan Austrian leh Swiss Alps hmun hrang hranga vur tawlh avangin mi 10 an thi.
New Zealand, China leh Germany atanga khualzinte pawh thi zingah hian telin vur tlengna hmun, ski resort eng emaw zatah chhiatna hi a thleng a ni.
Austrian thuneitute chuan vur nasa taka a tlak hnu leh thli a thawt nasat hnuah a sang ber dawttu, level four avalanche alert an tichhuak.
Warning tihchhuah ni mah se Austria khawthlang lama ski resort chu Vienna-a sikul chawlh a nih avangin a lun hle tho.
Austrian police chuan Pathianni khan thi panga an finfiah a, an zingah hian mipa kum 59 mi, khawthlang lama Tyrol-a vur then faina (snow plough) hmang mektu pawh a tel.
Sankt Anton am Arlberg-ah ski guide leh Hohe Aifner chhip-a vur tawlh nia hriat, putar kum 62 mi ruang an chhar bawk.
Inrinni khan New Zealander kum 17 mi, Chinese kum 32 mi leh German pa kum 50 bawr vel pawh vur tawlhin a hnawl avangin an thi a, an ruang hmuh tawh an ni.
Switzerland-ah pawh mipa kum 56 leh hmeichhia kum 52 mi chu chhimchhak lam, Graubuenden-ah vur tawlhin hnawlin an thi a. Swiss police chuan an zinga pakhat erawh himin a chhuak hlauh niin an sawi.
Ram pahnihah hian vur tawlh hi a tam hle thin a. Austria-a APA news agency chuan Inrinniah ringawt pawh khan Tyrol region-ah chuan hmun 30-ah tawlhin heng zinga 11-ah hian mihring an tel niin an sawi.
Austria-a level four alert hi ‘vur tawlh thut thlen theihna a sang hle’ tihna a ni a. Vur tawlh thang lutuk lote chu che chhuak lo tur leh tawlh thangte pawh hmun him lo zual laia kal lo tura tihna a ni.