Khawvela amateur mixed martial arts inelna thuneitu sang International Mixed Martial Arts Federation in a buatsaih tur Amateur MMA World Championship a tel turin India ram atangin fighter paruk thlan an ni a, heng zingah hian Mizo fighter chhuanvawr Zarmawia a tel dawn.
February 11 atanga 18 chhungin he championship hi Serbia-ah neih tur a ni a. Khawvela amateur MMA tournament awm tawh zinga lian ber tur niin ram 63 an tel dawn.
Chite Veng tlangval Zarmawia kal theihna tur hian Bialtu MLA leh Sports Minister Robert Romawia Ralte chuan a sponsor a. Sport Minister chuan a bial chhungah hetiang mi an awm chu lawmawm a tih thu a sawi a. Professional fighter a nih thlenga support a tum thu a sawi.
Zarmawia hi MMA India president Sharif Bapu pawhin sponsorship tenau a tihsak bawk a. Indian fighter kal tur zawng zawngte hi 411fightwear leh Raymond ten an kit mamawh an tum ang.
Amateur MMA World Championship-ah hian Mizo pahnih an lo tel tawh a, Zarmawia hi a pathumna tur a ni.
India rama record nei tha tak ni mek Zara hi lightweight leh welterweight-ah national champion ni lai a ni a, hetiang ni thei hi Indian MMA-ah an la awm lo.
18-2-0 MMA record nei mek niin Mizoram chhung bikah MMA leh Muaythai-ah tlawm vawikhatmah a la nei lova. Nikum a neih zawh tak LPS Pro Muaythai leh Mizoram Fight League-ah champion ve ve in title kawltu a ni mek.
UMAI national Muaythai professional tilte a kawl bawk.
Muaythai background niin hma a sawn a, fighter thiamna nei kim zawk nih a dah avangin SPES martial arts gym-ah Brazilian Jiu-Jitsu kum hnih chhung mimalin training a nei tawh a. Heta a training man pawh hi Sport Minister in a lo tumsak tawh bawk a ni.