Mi tu tih hriat loh eng emaw zatin Bangladesh hmarthlang lamah Hindu temple 14 lai an suasam niin Pathianni khan police-in an sawi.
“Zan thimah mi tih hriat lohte che chhuakin union (Bangladesh-a sorkar inawpna ram bial tê ber) pathum huam chhunga temple 14-ah milimte an suasam a ni,” tiin Thakurgaon-a Baliadangi-a Hindu hruaitu, Bidyanath Barman chuan a sawi bawk.
Puja Celebration Council General Secretary Barman chuan milim thenkhat chu tihchhiat niin thenkhat chu temple sira dilah paih an nih thu a sawi.
“Thim hnuai a nih avangin tute nge titute hi hriat theih a ni lo va; mahse, chhuia man chhuah ngei erawh kan duh a ni,” a ti bawk.
Hindu hruaitu leh union parishad chairman Samar Chattarjee pawhin an awmna lai bawr chu hetianga sakhaw thila chet chhuahna hi a tam a, rin dan inang lote inkara buaina leh tharum thawhna a thleng fo tawh thin tih a sawi.
“A tam ber, Muslim lak atang hian Hindu-te hian harsatna kan tawk ngai lo va, tun tuma thil thleng hi hriat thiam a har hle a ni,” a ti.
Baliadangi Police Station-a officer in-charge Khairul Anam chuan temple beihna hi Inrinni zan leh Pathianni khaw var hma inkara khaw hrang hranga thleng niin a sawi.
“He thil hi he rama muanna awm mek tihchhiat tuma phiarna avanga thleng a ni tih a chiang hle a ni,” tiin Thakurgaon police chief Jahangir Hossain chuan temple suasam pakhat bula thuthar lakhawmtuten an kawmnaah a sawi.
Police-in chhui zui nghalin a titute man chhuah ngei an nih tur thu a sawi a. “An lakah dan anga na taka chet a ni ang,” a ti.
“He beihna hi muanna leh khawtlanga inunauna tihchhiat tuma hmalakna a ni a, pawikhawihna serious tak niin a titute hian an phu tawk hremna an hmu ngei ang,” tiin Thakurgaon Deputy Commissioner Mahbubur Rahman chuan a sawi bawk.