Central Bureau of Investigation (CBI) chuan Pathianni khan Assam chief minister hlui, Hiteswar Saikia fapa chu Sarumataria, Guwahati-a a chenna in an dap hnuah an hreng zui.
CBI hian kum 1998-a thubuai ziah luh tawh an chhuinaah a in hi an dap a ni.
Thubuai hi Assam State Co-operative and Agriculture Development (ASCARD) Bank-a sum chingpen a ni a. Paltan Bazar police station-a ziah luh bawhzuiin CBI hian an chhui a ni.
Kum 2001 khan CBI kutah thubuai hi hlan chhawn a ni a. Kolkata Branch-a complaint a luh angin an chhui zui a. Kum 2013 khan Ashok Saikia hi a inhnamhnawih ngei tih an tichiang tawh bawk.
A inrawlh tih an tihchian hnuah chief minister hlui fapa hian court-ah ngaihtuah tha leh turin a kal mek.
CBI court-ah Thawhlehni hian a inlan dawn a, amah chuan bank-a tihfel ngai a tifel vek tawh niin a sawi a, bank-in a nemnghehna pawh pho chhuah tur a nei tih a sawi.
Bank pawhin, “Hei hian Pu Ashok Kr. Saikia, Director, HPS India Pvt. Ltd., Nandan Nagar, Sarumataria, Dispur Guwahati-6-a cheng, Assam state, Co-Operative Agriculture & Rural Development Bank Ltd.-a loan la chuan kum 1996-a Bridge loan scheme hmanga a loan lak, Rs. 9 37,701.00 chu lehkha, Ref. No. ASCARDB (L/C) 192/2002/61 Dated. 14.09.2011-a a lan ang hian a lak leh a pung nen a pe kim vek tih a entir a. Tunah chuan a loan hi a awm tawh lo,” tih a inziak.
Bank lehkha hi October 10, 2015-a tihchhuah kha niin General Manager in-charge, H.N. Borah-an a hming a ziah hnan a ni.