Aizawl: Kangmei chhuak thei laka fimkhur inzirtirna hapta, Fire Prevention Week chu nimin atang khan Mizoram pumah hman tan a ni.
Aizawlah chuan Home Minister Lalchamliana’n Kangmei Ven Hapta hi Vanapa Hall-ah a hawng a, mei chu mihringte dam khawchhuah nan tangkai em em mah se fimkhur loh chuan mihringte tana thil pawi thlentu a nih thu a sawi a. Mei thunun loh chuan in kang leh ram kang a siam thin a ni tih Zoram mipuiten hre thar se a duh thu a sawi.
Home minister chuan tlangram lo neituten meikawng an vil that loh avangin ramngaw tam tak a kang chhia a, sorkar danin a phal loh sapel thinten ramsa ei tur hnah chawr a lo awm theih nana ram an hal thinte chuan ramngaw a tichereu nasa tih a sawi a. Tlangram lo neite chu lo an hal dawnin kangmei chhuak lo tura meilam sial uluk turin a chah.
Khualzahawm, Forest Minister T.J Lalnuntluanga pawhin ramngaw venhim kawngah sorkar leh mipuite tanrual a pawimawh thu sawiin thunun loh kangmei chhuak veng turin Zoram mipuite a sawm a. Tlangram lo neih chu a thlakna tur ruahman chhoh mek a nih thute, agroforestry hmanga huan nghet neitute an pung zel chuan ramkang duai duai thin a tihtlem hret hret a beisei thu te a sawi bawk.
Aizawla Fire Prevention Week hawnna inkhawmah PCCF RK Singh kaihhruaiah hian kalkhawmten ram tikang lo turin thu an tiam rual bawk a ni.