Aizawl: ZPM Working President K Sapdanga chuan pawisain an party candidate an zawng lo tih sawiin ZPM chu ipte ruakin an campaign dawn avangin theihtawp chhuaha thahnemngaih a tul hle dawn tih a sawi.
Nimina ZPM chhung inkhawmah thu sawiin K Sapdanga hian Mizorama political party dangten jubilee te an lawm tawh laiin ZPM chuan kum ngana an hmang mek chauh a, tawnhriatah te, remhriatah te, tih duh zawngah te an inan loh avangin an zavaia theihtawp an chhuah a ngai tih a sawi.
K Sapdanga hian tun hnaiah chief minister-in ZPM pachhiatzia uar deuhin a sawi a, ‘an candidate turte pawh pawisa pai tur an neih dawn loh avangin candidate pawh an hmu mang lo a niawm e,’ tia a sawi chu, khatiang khawpa indakna kha an la dawng lo nia sawiin, “A lawmawm tak zet. Min hre dik chiah, pawisain candidate kan zawng lo chiang khawp mai,” a ti.
An hotute an sawi angin ZPM chu thawkrim ber nih an tum thu leh sum hmachhuan loa sum seng tlem ber nih an tum tih sawiin K Sapdanga hian, “Zep pawh a ngai lo a, kan neih bak sen pawh a ngai lo a ni. Mizoramah leh state thenawmah pawh hausa pawl a lar em em. Keini state-ah ngei pawh party thenkhatten an candidate-te sum tam tak paitir an tum a, keini erawh chu ipte ruakin an campaign ang; chuvangin, theihtawp chhuaha thahnemngai turin kan insawm duh a ni,” a ti bawk.
R Malsawmtluanga, General Secretary kaihhruai inkhawmah hian Thangkhuma, PAC member pawhin thu a sawi a ni.