Nimina Rajya Sabha thutkhawmah Mizoram atanga Rajya Sabha member, K Vanlalvena zawhna chhangin Union Minister, Petroleum & Natural Gas changtu, Rameswar Teli chuan Meidum-ah natural gas hmuh chhuah a nih tawh thu a sawi.
Teli chuan Kolasib district Meidum khuaah January 5, 2012 khan ONGC-in natural gas an hmuhchhuah tawh thu sawiin, “Tun thlengin gas lak chhuah hna erawh thawh a la ni lo,” a ti.
Tuialhthei dahkhawlna hmun, oil depot chungchang zawhna pawh union minister chuan Indian Oil Corporation Ltd (IOCL)-in Sihhmuia oil depot siamna atana ram an en chu a hmun a tha tawk tih an report tawh thuin a chhang a. Oil depot siam hna thawh chu Mizoram sorkarin land acquisition an tihfel hma leh hma lovah a innghat niin a sawi.
Union minister, Jal Shakti changtu, Bishweswar Tudu pawhin Rajya Sabha MP zawhna chhangin Mizoram thingtlang khaw hrang hrangah ruahtui khawl khawmna atana tuikhuah leh dil siam hna thawhna atan PMKSY scheme atangin a thawh khatnaah kum 2015 atanga 2021 chhungin Rs. vaibelchhe 282.16 pek a nih tawh thu a sawi a, a thawh hnihna atan Rs. vaibelchhe 28.44 chu 2022 chhungin Mizoram sorkar hnenah pek a ni tawh tih a sawi bawk.
Parliament thutkhawm neih mekah hian Mizoram MP K Vanlalvena chuan minister hrang hrang 20-te chhan turin zawhna 63 a thehlut nia hriat a ni.