- MC Lalthianghlima
Kum 2023 atâna Mizo hnam rûn (MNF Gen. Hqrs office) hawn a nih ni a, kan ram Lal ber Chief Minister (MNF President) thusawi kha social media lamah kan lo hmu deuh vek tawhin ka ring. A thusawi zinga a sawi uar ber pakhat chu, party tana sum (pawisa) a lo la kal hnem tur zia kha ni berin a lang a, a sawi zêlna ah chuan; Aizawl west by pass road laihna atân 500 core dah a nih thute, chu chu a kawng laihna tur chauh a la nih thu leh hei hian a nuaih sang tel mai ni lo, nuaih sing tel a rawn hrin ngei ngei tur thute a sawi a. Rev. Bankuaia’n Cherra a Pathian thu a zir lai a an zirtirtupa dul ah phênglâwng a a vih thu chu, tehkhin thu ah la chhuakin, party tan a sum (pawisa) a lo luh hun ah chuan MNF party chhuahsantute chu an la inchhir ngeia ringin, “A dul-ah phênglâwngin ka lo vit hma lutuk a ni aw.. ” an la tih ngei a rin thute a sawi bawk a nih kha.
Kan ram Lal ber chuan, a sawi zêlna ah “ZPM leh Congress ahte an kal a, khatah khan contrac a tam chuang der si lo, supply order a tam chuang si lo…” a ti a, a sawi dik takzet a ni. MNF ni lo, party dang ah hian contrac leh supply order a tam chuanglo ni satliah mai lovin, a awmin a awmlo takzet a ni. Nimahsela, tun dinhmuna MNF party chhuahsana party dang zawm mêktute hian an party zawm tharah hian contrac leh supply order pawhthlak tur a awm loh zia chu hrilh hriat chawp ngailo khawpin an chiang viau turah ngaih sak ila. MNF party administration leh an chet vêl dan ah hian duh khawp lovin, rorêlna tha zawk leh sorkar thar felfai zawk an beiseina avang leh chu sorkar thar siam tura party dang zawm an ni turah ngai leh phawt ila, contrac leh supply order an thlakhlelh vang a nih loh ngei pawh beisei teh ang.
Hotupa ber chuan, election (2023 MLA inthlanpui) fight pui tur Pathian in a hun takah a pek mêk thu leh a pe zêl dawn tih hre turin MNF party chu a chah bawk. A thusawi kalhmangah chuan, 2023 MLA inthlanpui kan hmachhawn tur ah hian hotupa ber thinlung ngaihtuahna chu pawisa (sum ah) a innghat lian hle ni ngeiin a lang a. Campaign-na atân sum (pawisa) an ngah tawk thawkhat ni a an inhriat chuan, sorkar siam chhunzawm leh thei ngei turin an inringtâwk hle niin a lang.
Hetih rual hian Mizo mipuite hi sum (pawisa) hmang a hneh theih duâk turah min ngai niin a hriat, a chhan chu “Cheng nuaih thum” min tawkdarh a, kan thlang tling tawh miai si a, “An hmui ah chithlum kan tât tawh” ti ni âwm takin, sum hmanga sorkarna siam chhunzawm ngei an inring niin a hriat bawk. Aw…, Mizo mipuite hi kan nêp kan ti dawn nge, politician sum (pawisa) ringawt hmachhuantute hian, min va zuamin, a va retheih thlak êm!
He kan ram Lal ber thusawi hian ngaihtuahna a ti kal thui hle a, kan ram Lal ber hi dem vek theih loh a nihna lai pawh a awm, mipui pawh kan inenfiah a hun ta hle mai. Ram rorêlna tha leh mipui hmasawnna tur tak tak (Politics dik tak) thlîr lova, “Sum ngah ngah hmêltha” kan la tih tlat chuan, kan ram hma lam hun hi a êng lo hle a ni.
“A chhiat lai ber hunah MNF min sorkar tir a …” tiin Mautâm leh Covid period te rawn sawi langin, hun harsa kan tawh thu leh kan sum dinhmunte kan ram Lal ber chuan a rawn sawi lang a, a dikna chin a awm ngei e. Mautâm leh covid period kha hun harsa tak chu a ni ngei mai. Nimahsela, ram mipui, a tê ber atanga a lian ber thlenga kan thawhhona that zia leh kan tanrual ziate, mipui lam pawh sorkar puih a meikawh a kan chet tam zia kha mitthlaah a rawn lang zut zut a, a bik takin covid vanglai phei kha chuan, Chief Minister Relief fund ah pâwl leh mimal, Kohhran thlengin kan chhung lût ruih ruih a nih kha, a bak thil dang pawh sawi sen a ni love. Mautam period ah lah khatih hun laia kan sorkar khan BAFACOS sum (pawisa) tam tak a hmu chamchi bawk a nih kha. Khatiang pawisate kha Arvind Kejriwal-a khuan khawih ve ta se, engtin nge a hman ang aw…? tihte hi, tun hnuah hian ka ngaihtuah ta mai mai a.
Open Market Borrowing (OMB) hmanga pawisa pûk phal zât, kan Mizoram sorkar-in a pûk zawh tep tawh lai hian, kan ram kalphung hi mut-mawh, hnar-mawh ah kan neih a hun takzet tawha, kan pachhiat zia ngaihtuaha, mei-kawha hma lam hun kan pan a ngai ta a nih hi.
Mipui hian MNF party hrim hrim hi kan ngeiin, kan haw ngawt awzawnglo mai, chutihrual erawh chuan ruling party, sorkar fawng chelhtu an nihna zawnah, kan ram hian hmasawnna lamtluang hi zawhin, politiciante rilru sukthlek leh ram mipui rilru put hmang, politics kan thlir dan hi her danglama, politics dik tak kan neih theih duhna avangin kan han au chhuak lo theilo a ni zawk e.
MNF party chhuahsana, party dang zawmtute hian kan ram Lal ber dul-ah phênglâwng-a an vih leh vih loh erawh chu, an rilru put hmang leh hun hian a la rawn hril chiang turah ngai ila, thluaka sum lût an nih ngawt loh chuan, an inchhirlo turah i ngai phawt teh ang u.