Turkey chhimchhak, Syria nena an inrina bul lawk chu lirnghing na takin a sawi a, Thawhtanni tlai thleng khan mi 1,700 chuang thi an awm tawh a, mi mut lai a nih avangin in chim karah mi tam tak an la tang bawk.
US Geological Survey chuan magnitude 7.8-a na hian an ram sanaa Thawhtanni zing dar 4:17 (India-a zing dar 6:47)-ah Gaziantep khawpui bul lei hnuai km 17.9 vela thuk atangin a sawi tih an sawi.
A hnu darkar eng emaw zatah magnitude 7.5-a nain Kahramanmaras province-a Elbistan district a sawi leh bawk.
Turkey-ah ringawt pawh mi 1,000 chuang thi awmin Syria-ah mi 500 chuang an thi bawk.
Turkey President Recep Tayyip Erdogan chuan an rama thi hi mi 1,112 an nih tawh thu a sawi.
Syrian health ministry chuan Aleppo, Latakia, Hama leh Tartus province-ah te mi 671 an thih tawh thu an sawi bawk.
Chhanchhuaktu pawl, White Helmets chuan helin an thunun lai, Syria hmarthlang lamah tanpui hna thawkin mi 147 vel thi an awm tih Twitter-ah an tar lang.
In tam tak a chim a, chhanchhuah hna thawktute hian in chim inbawhthuah chhah tak hnuaiah dam chhuak an awm leh awm loh an dap mek.
In chim zingah hian kum 2,000 chuanga upa tawh, hmun hlui hriat hlawh tak, Gaziantep Castle pawh a tel.
Lirnghing hnuhnung zawk hi chhun dar 1:24 (India-a chawhnu dar 3:54)-a thawk niin a nghin hmasak intanna atanga hmar lam mel 80 vela hla, Pazarcik district, Kahramanmaras province-ah a ni.
Turkey sorkara Disaster & Emergency Management Authority chuan ‘nghing nawn (aftershock) a ni lo’ tih sawiin, a hmaa nghing nen ‘a hrang’ tih an sawi.
Nghing hmasaah khan Kahramanmaras pumah mi 70 vel thi an awm tih sawi a ni a, Gaziantep-ah mi 80 vel an thi bawk.
Turkish Interior Minister Suleymon Soylu chuan lirnghing hian khawpui 10 vel a tihbuai thu leh hengte hi Hatay, Osmaniye, Adiyaman, Malatya, Sanliurfa, Adana, Diyarbakir leh Kilis an ni.
Turkey-ah hian mi 5,385 vel zet hliam tuar awmin Syria-ah mi 1,000 velin hliam an tuar bawk.
Diyarbakir khawpuiah hian shopping mall a chim niin BBC chuan a tar lang.
Lirnghing hian Lebanon leh Cyprus pawh a sawi tel.
“Eng emaw ka ziah lai a ni a, rang takin in pum chu a lo insawi a, eng nge a nih chiah pawh ka hre lo,” tiin Lebanese khawpui, Beirut-a zirlai pakhat, Mohamad El Chamaa chuan BBC a hrilh.
“Tukverh bul chiahah ka awm a, a nghing dawr dawr chuan min tihlau hle a. Minite 4-5 vel a ni a, ka rap hle a, eng nge tih ber tur pawh ka hre lo,” a ti.
Gaza Strip-a BBC producer pakhat, Rushdi Abualouf pawhin secomd 45 vel a awmna in chu a sawi thu a sawi.
Turkey hi khawvela lirnghin duh berna hmun laia awm a ni.
Kum 1999 pawh khan an ram hmarthlang lam sawiin mi 17,000 chuang zet an lo thi tawh.