Inter Milan in first half-ah striker Lautaro Martinez hmanga goal an khung chu an chakpui a, 1-0 in Milan derby-ah AC Milan an hneh.
San Siro-ah Derby della Madonnina hi khelh a ni a. Inter in hnehna an chan avangin Italy champion lai hi Serie A-ah a zawnin vawi thum an tlawm tawh.
Inter goal khungtu Martinez hi inkhel tan phat atangin a tal hnawk viau a, Milan goalkeeper Ciprian Tatarusanu chuan a goal khung tur dansak tha tak a nei a, minute 34-naah erawh corner atang tun season a a goal 12-na a tauh lut.
Milan tan striker Olivier Giroud chuan chance tha vawi hnih a nei a, substitute Brahim Diaz goal shot chu Inter goalkeeper Andre Onana chuan a dansak bawk.
Inter hian an goal khung vawi hnih pawm loh an nei bawk a. Striker Romelu Lukaku goal khung chu foul avanga pawm loh niin Martinez-a’n offside vanga pawm loh goal a nei thung.
Inter coach Simone Inzaghi chuan, “Inkhelah kan chungnung hle a, ka team te pawh ka lawmpui. Ni 20 chhungin derby vawi hnih kan chak a, a hmasa zawkah trophy kan chawi phah bawk.”
“Tunah chuan hmalam thlira kan inbuatsaih a ngai a, ka hmachhawp zel kan thlir a pawimawh.” a ti.