Sipai rorelna eptu tangrual pawl, Myanmar National Unity Government (NUG) chuan April 5 khan mipuite venghimtu tur atan ‘people’s defence force’ an din lailawk niin an puang.
February 1-a Myanmar sipaiten mipui rorelna an hnehchhuh hnuah ni tin deuhthaw mipui lungawi lovin nawrhna an lantir thin a. Sipaite kutah civil mi tam takin nunna an chân tawh.
NUG chuan thuchhuah an siamah sipai thar an din chu Federal Union Army an din tak tak hmaa an din lailawk a nih thu leh kum 70 chuang tual chhung indona an neih tawh tihtawpna tur atana an hmalakna niin an puang bawk.
Thla hmasaa sorkar paih thlatu sipaite eptu pawlin an din tangrual sorkar hian an rama buaina chhuak thin titawpa mipui sorkar tungdingin, ‘federal democratic union’ din thar an intiam.
NUG chuan an invenhimna tura ruahmanna an siam tharte eng ang takin nge an kalpui dawn tih te, eng ang ralthuamin an inthuam dawn tih leh eng nge an thil tum ber an la puang tel lo thung.
Myanmar-ah hian ralthuama inthuam, sipai tha bik nia an sawi chu Tatmadaw tih an ni a. Anni hi tawnhriat nghah tak, an ram chhungah chuan tawhkhirh ber tura ngaih an ni.
Amaherawhchu, sipai eptute hian tun hnaiah ralthuam mawlmang tak tak hmangin an bei let ve thei zel a. Thenkhat erawh chu kum 1948-a an ram a indan hnu atanga hnam sipaite leh ram chhung sipaite an inkah fo avangin tha tak taka training neite an ni thung.