Brooklyn Nets chuan an star pakhat zawk Kyrie Irving chu Dallas Mavericks hnenah trade in an kaltir.
Mavericks hian Irving lakluh nan hian Dorian Finney-Smith leh Spencer Dinwiddie te bakah 2029 first-round pick leh second round pick pahnih (2027, 2029) te an pe tel a. Nets hian hlawh chungchangah an inremna a inmil tawk nan Markieff Morris an pe tel bawk.
Tun kartawpah NBA trade deadline a tawp dawn a, hemi hma hian team hrang hrangten season tawp thlirin team tihchak an duh a. Team thenkhatin season thar leh hma hun thlira team insiksawi nan hman an tum thung.
Nets hian an draft pick dawn ho hi trade dang a hmang leh chhawng a, Zirtawpni zing a trade hun khar a nih hma a team tihchak nan hman leh an tum.
Kum 30 mi Irving hi Los Angeles Lakers leh LA Clippers te pawhin an ngaihven a, nimahsela Nets hian Lakers hnena kaltir an duh lova. Dawrtu dang an neih ho zingah Mavericks dilna an duh ber.
Dallas-ah hian All-NBA star Luka Doncic nen an inkawp dawn a, engtinnge team an insiamrem dawn tih hriat la ni lo mahse an inkawp fuh chuan West-ah team hlauhawm ber ni thei tura ngaih an ni.
Irving hian tun season-ah minute khel tam lo mahse 27.1 points, 5.1 rebounds leh 5.3 assists average a nei mek.