Indian police-te chuan Indian Railways hnuaia hna zawng laite hna hmuhsak theia insawia cheng tam tak nena mi enh emaw zat bumtu mipa pahnih an man.
Mi bumtute hian an mi bum mi 28-te chu rel station-ah chawlhkar eng emaw zat chhung rel vei vel zat chhiar turin an ti a ni.
Police chuan he inbumna hi nikum November atang khan an lo chhui tan tawh.
An mi bumte hnen atang hian Rs 2,00,000 atanga Rs maktaduai 2.4 thleng laksakin ticket examiner, traffic assistant leh clerk hna hmuhsak thei tur angin an insawi a ni.
Indian Railways hi khawvel huap pawha hnathawk chhawr tam ber pawl an ni a. India-ah hian thalaiten hna nghet, innghahna tlak a duh avangin sorkar hnaa luh a duh hle a, inbumna pawh a tam thin.
Tuna mi pahnih a man, Sivaraman V leh Vikas Rana te hi inthurual niin Tamil Nadu lam mi an ni a. An mi bumte hi thla khat chuang zet Delhi-a rel station pui bera platform hrang hrangah ni khatah darkar riat chuang ni tin rel kal vel an chhiartir thin a ni.
Police chuan Rana hi Delhi chhuak niin National Museum of Natural History-a thawk thin niin nikum March khan a bâng niin an sawi a. Sivasiram erawh Tamil Nadu-a cheng niin Times of India chanchinbuin a tar lang thung.
An mi bumte hnenah hian ni tin station kal peltu rel zat chhiara chhinchhiah turin an ti niin Press Trust of India news agency chuan a tar lang.
An mi bum zinga pakhat chuan Covid-19 avanga harsatna nasa tak an tawh hnuah an chhungkaw tana tangkai nih tuma remchang zawng a nih thu Indian Express chanchinbu hnenah a sawi.
Police hian sipai hotu thin pakhat, Subbuswamy hnen atangin he inbumna hi an hre tan a. Ani hian an mi bum zinga pakhat a tawn atangin a hre ve thung.
An mi bum thenkhat hian a bumtute hnena pek tur hian mi pawisa pawh an puk nual.
Man an nih hnuah hian thu zawh fiah mek an ni a, thu chhuah erawh an la nei lo.