Pathianni tlai khan CID (SB) leh 2nd Assam Rifles tangkawpin mi pahnih kut atangin dan loa tawlh ruk ralthuam an man.
An thudawn bawhzuiin CID (SB) leh 2nd Assam Rifles te chuan Bungtlang South atanga phurh 22 AK Automatic Rifles (China siam) pahnih, magazine pahnih leh .22 silaimu pali chu Hmuifang daiah Bolero (dum), MZ05A-5990 atangin an man.
Silai leh a mu phurhna lirthei khalhtute, Isak Pawla (31), Chamdur P leh Rochunga (40), Project Veng, Chamdur P, Lawngtlai district-a khawsa ve ve nia insawi te an man nghal bawk.
Heng silai leh a mi an mante an chhui zuina atangin Lianthanga (42), Mualcheng South, Lunglei district leh Lalpianmawia, Melthum, Bethel Veng, Aizawl-a cheng nia inchhal te pawh heng ralthuam te hi dan loa hralhna turah inhnamhnawih nia rinhlelh avangin an man nghal bawk.
Ralthuam kaihhnawiha an mante hi Sialsuk Police Station-ah thubuai ziah luh nghal a ni.