Aizawl : BJP Mizoram President Vanlalhmuaka chuan MNF sorkar chu thil awm lo leh do ngai rih lo Uniform Civil Code (UCC) aiin hmasawnna ngai pawimawh zawk tur leh ngaihtuah hmasak zawk turin a phut.
Nimina chawlhkar thar inhlanna BJP pisa-a neihah thu sawiin Vanlalhmuaka chuan, MNF President Zoramthanga, Chief minister kaihhruai MNF Legislature Party in Assembly session lo awm tura UCC dodalna puh luh an tum chu thil awm lo leh do ngai rih lo nia sawiin, “Mipui ngaihdan hruai kawi tumna a ni. Thudik lo leh thu belhchian dawllo vawrh darh a, Mizoram mipui hnena an intiamna an tih theih si loh laka inphen tumna mai a ni,” a ti.
Vanlalhmuaka hian, sorkar laipuiin parliament thutkhawma UCC pass mai tura an ngaih avanga MNF party President Zoramthanga kaihhruaiin a tawp thlenga do tur thu an puan chu thil tak tak lo a nihzia chu MP (RS) K Vanlalvena’n Union Law and Justice Minister Kiren Rijiju chhannain a tichiang hle niin a sawi.
BJP Mizoram President hian, UCC buaipui loin Mizoram mipuite hmaa an intiamna – chhungtin tan cheng nuai 3 sem te, kum hnih chhunga Aizawl khawpui Traffic Jam awm lohna khawpuia siam te, Aizawl khawpui kawng chhawng siama intiamna te, vai buhfai ring loa buh leh bala intodelhte, Zokhawsanga Assam Rifle sawn chhuah tum te, Assam – Mizoram ramri buai chungchangah te hian Chief Minister Zoramthanga hian ngaihtuahna seng zawk turin a chah a ni.
Mizoram sorkar pawhin Union Budget 2023-2024 a thal theih tura an dah hi mipuin an chhawr theih ngei turin Chief Minister Zoramthanga, Finance changtu ni bawkin hma la tura a phut tih Vanlalhmuaka hian a sawi bawk.