Harry Kane chu Tottenham Hotspur chanchin a goal khung hnem ber a ni a. Jimmy Greaves-a record khum turin club tana a goal 267-na a khung a. Manchester City lakah a club hi 1-0 in a chakpui.
Pathianni zanah Tottenham Hotspur Stadium thawm ring tak karah England captain hian mellung thar hi a kai a. Minute 15-naah Pierre-Emile Hojbjerg thawhrah sengin penalty area chhunga a ball tha hmuh chu goal-ah a khung.
“King Kane”
Kum 29 mi hian kum 2011 August 25 khan amah chherchhuaktu club tan hian a vawikhat nan a inkhel tan a, December 15-ah a goal hmasa ber a khung.
City laka a goal khung hi Premier League-ah a goal 200-na chiah a ni bawk a. Premier League chanchinah ani aia goal khung tam hi lan Shearer (260 goals) leh Wayne Rooney (208) te chauh an awm.
“He club chanchin a striker lo awm tawhte hi thlir ila, khawvela tha ber zing ami Jimmy Greaves khumtu ka ni thei hi ka lawm hle.” tiin Kane chuan a sawi.
“Premier League record hi Alan-a ta a ni a, khum theih ka tum dawn. A lawm lo ang em ka hre lova, mahse goal hi chu ka la khung belh nual dawn. Ka tha a la za tha hle.” tiin Kane chuan a sawi belh.
Tinge Man City?
Pep Guardiola pawlten Arsenal nen an inkar tihzim theihna hun an nei a, mahse an hun remchang neih an hmang lo. Huntawp dawnah defender Cristian Romero hnawhchhuah a nih hnuah pawh awmzia an nei thei chuang lo.
City in ball inpe kual tha mahse a hmawr bawkna a awm thei lova. Striker thar Erling Haaland a ‘nil’ chiang hle a. Spurs penalty area chhungah ball vawikhatmah a khawih lo.
Rodri leh Julian Alvarez ten chance tha nei mahse Hugo Lloris leh Erid Dier ten an goal khung tur an dansak ve ve.